Недляшиста, 11 декабрьста, Владимир Волков ванозе мокшэрзянь живописецть Никита Пичугинонь выставканц. Экспозициясь, коза сувась мастерть мекольдень вете кизоста тиф сядода лама работац, панжевсь 1 декабрьста С.Д.Эрьзянь лемса изобразительнай искусствань музейть выставочнай залсонза республикань оцюнять ширень кирдеманц вельде. Васенце шиста сявомок выставкать, конань авторсь лемдезе эсь алянцты, ванозь 500-да лама ломань.
Никита Пичугин – од, но отечественнай искусстваса ни лац содаф мастер, Ф.В.Сычковонь лемса Саранскяй художественнай училищань выпускник, 2011 кизоста сявомок Россиянь художниконь союзонь член, активнайста няфнесы Мордовиянь тяниень пингонь изобразительнай искусствать российскяй и международнай уровенень художественнай выставкатнень и форумтнень эса. Сонь работанза улихть Россиянь, Германиянь, Франциянь, США-нь, Канадань корпоративнай и частнай коллекциятнень эса. С.Д.Эрьзянь лемса МРМИИ-са выставкась – васенце персональнайсь шачема ширесонза. Владимир Волков интерес мархта ванозе экспозициять, кизефнесь од мастерть работанзон квалма. « Тя картинатне – простойхть и изысканнайхть фкя пингста, синь – натура лангста работань цебярь пример, эсост няеви природать ваймонь тарксемац, простой, но тяка пингть - кажнайти шарьхкодеви и питни паршихнень ваймосна…Арьсян, именна тянкса Никита Пичугинонь творчествац кельгови пяк ламотненди, а выставкась арась афкуксонь праздникокс Мордовиянь эряйхненди и инжихненди», - азозень няйфть эзда эсь мялензон-арьсеманзон республикань Оцюнясь.