17 апрельста выставканц ванома сашендсь Мордовиянь Оцюнясь Артём Здунов. «Первополосные» - тяфта лемтьф экспозициясь. Ламоцне няфтьф фотографияса печатлакшневсть газетань васенце лопаняса.
Тя профессияти Олег Еремин сась сюконямок тядянцты-алянцты – Василий Петровиченди и Зинаида Ивановнанди, синь покодсть фотографокс ошень бытонь службаса. Сяс тя тевти Олег Васильевич тонадсь нинге идькс пингста. И тянивок тянь тиендьсы – лувсы, што эряви фалу тонафнемс одти, касфнемс содамошитнень и маштомашитнень. Кода корхнесь Льюис Кэрроллть персонажец: «Эряви ласькомс прянь-пильгонь синнезь, штоба лядомс эсь вастсот, а штоба козовок повомс, эряви ласькомс кафксть сяда вишкста».
«Стане лиссь, што выставкась ётни семьянь Кизоста и трудовой династиянь Кизоста, - тяшкстазе Мордовиянь Оцюнясь. – Арьсян сяда товолдонь творческяй сатфкст! Инь эрявикссь – поладомс козякофнемс республикань фотолетописть и тонафнемс касы поколениять».
Фотожурналистть лафтувонзон фтала – козядонга-козя послужной спискась, лама премияда и казнеда. 2000 кизоста сявомок сон – Россиянь журналистонь Союзу сувайсь, Мордовия Республикань журналистонь Союзу сувайсь. Артём Здунов казезе Олег Ереминонь «За личный вклад в развитие Республики Мордовия» Мордовия Республикань Оцюнять Почётнай знаксонза.
Эсь профессиянц фотомастерсь кельгсы нинге сяс, мес сон макссь теенза лама ялгада. Олег Васильевич мзярдовок аф юкснесыне эсь тонафтыензон и покоди ялганзон, синь лезксснонды сон кассь тя профессияса, фалу лямбе валса синь лятфнесыне – тят Юрий Кемаев, Анатолий Макеев, Вениамин Тюрин, Сергей Стенькин, Николай Каранов, Эдуард Ретунскяй, Андрей Кондратьев, Юрий Глебов, Геннадий Арефьев. Сембе синь – эсь тевонь содай ломатть, синь тевснон мельге сон ванондсь, тонафнесь, тяни сонцьке тонафнесыне покоди од ялганзон.
Эсь работанц колга Олег Еремин азондоль пяк лама. Сон лац мяляфтсы выставкаса няфтьфт эрь снимкать историянц. Инь кельгови жанрац – спортивнай фоторепортажсь. Тевсь - аф тёждя. Тяса эряви улемс содайкс аф аньцек техническй ширде – эряви содамс и марямс спортонь видть. Олег Еремин мастеркс няфнесы эсь прянц – сон аф штатнай фотограф «Чемпионат» оцюдонга-оцю российскяй спортивнай интернет-порталса, сон вачкотькшнесь эрь кодама пялькстомат, сувафтомок футболть коряс миронь чемпионатть 2018 кизоня.
А нинге Олег Еремин лац содасы перьфпяльть – сонь колганза, кода и фотографиять, сон азондоль пяк лама. Цебярь ялга, конань лангс фалу ули кода надиямс – Олег Васильевич, сюкпря, мес тон улят, мес покодят маласонк! Минь тонафнетяма эздот, тяконь лувксса пара ваймоцти и пшкядемацти!
Олег Ереминонь выставкац кармай покодема Эрьзянь музейса 12 майть самс.
Мордовия Республикань Оцюнять пресс-службац