«Тячи минь чествовандасаськ ломаттнень, конат ванфнесазь и аралакшнесазь национальнай козяшить толда, аф законц коре керсемада и чрезвычайнай ситуацияда. Тя веши эсь прянь аф ужяльдезь работама, тевти эсь лацоннекс малаткшнема, - мярьгсь республикань руководительсь. - Задачать оцю общественнай значенияц — кда мезське моли аф тяфта пожарса пелькс сезонть пингста, сембе заняфт аньцек тянь мархта, кадондсазь шири лия тефнень. Вирьхненди кородозь малаткшнемась, синь маштозь тевс нолямасна — тя государствать васенце вастса ащи тевонзон ёткста фкясь».
Азфоль, што васенце задачатнень ёткста фкясь — пожархнень каршес тюремась. Вирень фондть моданзон лангса противопожарнай башка режимть пингста тядде ашель фкявок оцю пожар. Тянь удалась сатомс видео мониторингть вельде. 19 камерась лезнихть эсь пингстонза няемс и лоткафнемс крвязематнень. Кизоть аделавомс ули ладяф видеонаблюдениянь нинге несколька точка.
«Экология» национальнай проектть мяльса кирдезь мольфтеви вирьхнень касфнемасна. Тядде арьсекшневи озафтомс шуфтонят 2 тёжятть гектаронь площадьса. Мордовиянь Оцюнясь китькстазе социально значимай, массовай мероприятиятнень - «Сад Памяти», «Сохраним лес» важнайшиснон.
Башка мяль Мордовияса шарфневи посадочнай материалть анокламанцты — тядде Зубово-Полянскяй и Дубёнскяй райононь вирень питомникнень эса касфтф 5,5 миллион сеянец. Мордовиянь Оцюнясь путсь задача — полафтомс тя ситуациять: водендамс инвесторхт, максомс теест мода.
Тяддень 8 ковста вирень государственнай инспекторхнень мархта лангс лихтьфоль вирьхнень аф законц коре керсемань 9 случайхть. Карьхцть лувксоц, кона тифоль вирень фондти, арась 19 миллион цалковай.
Артём Здунов китькстазе, што контрольсь тя ширеса должен улемс фалувонь.
Мордовиянь Оцюнясь макссь казнет вирень работникненди. «Российскяй Федерациянь Заслуженнай лесовод» почётнай лемсь максф Кочкуровскяй участковай лесничествань лесничайти Василий Русяйкинонди.
«Тя оцю казне сембе коллективозти. Мон 40 киза ни работан вирень хозяйствань системаса — ванфнесайне вирень козяшитнень пожарда, аф законц коре керсемада. Мон лесниконь династияста — атязе и щенязе стане жа работасть тя сфераса», - мярьгсь Василий Русяйкин.
«Тинь трудонте лемтьф важнай целенди — ванфтомс и ламолгофтомс вирень козяшить, тинь ётафнетяда оцю просветительскяй работа, тинь наставниктада од ломаттненди» - поздравляндазень профессиональнай ила мархта вирень работникнень МР-нь Госсобраниять Председателенц заместителец Сергей Вдовин.
МР-нь вирень, охотничьяй хозяйствань и природопользованиянь министрсь Адель Галлиулин китькстазе, што стратегическяй задачась, кона ащи ведомствать инголе, - вирень отраслять цифровизацияц. Тяддень кизоть аделавомс Мордовиясь странань васенце субъекттнень лувксса полады вирьхнень учетснон коряс электроннай системати.
Церемониять пингста стане жа тифтольхть итокт «Сохраним лесное наследие Республики Мордовия» республиканскяй конкурсти. «Мордовия Республикань инь цебярь лесниксь» номинацияса дипломсь максфоль Виндрейскяй территориальнай лесничествань лесничайти Василий Пятинонди, «Инь цебярь ваймосема вастсь» номинацияса — Темниковскяй территориальнай лесничествань коллективти, «Мордовия Республикань инь цебярь лесопользовательсь» номинацияса - «Агро-Дубенки» лесозаготовительнай организациянь коллективти.
«Мордовия Республикань инь цебярь школьнай лесничествась» смотраса-конкурсса сяськикс арасть Теньгушевскяй райононь Барашевскяй средняй школань тонафнихне. Мордовиянь инь цебярь экологическяй организациякс лувф «Зеленый мир» движениясь.
Мордовия Республикань Оцюнять пресс-службац