10 мартста Мордовиянь Оцюнясь Владимир Волков етафтозе «Россия-2018» региональнай организационнай комитетть заседаниянц. Главнай задачась, конанань путозе республикань вятись, - миронь чемпионатти анокламань пингти кирнемась.
«Чемпионатти лядонды цють кизода лама, и тячи минь ащетама анокламань пяк ответственнай этапса, мзярда эрявихть вихонзафтомс сембе ресурсне. Пцтай сембе объекттне, конат строявихть 2018 кизонь налхкоматненди, сувафтомат тевс тядде ни. Инголе пяк стака работа, штоба пяшкодемс анокламань сембе программать», - китькстазе Владимир Волков.
Целайнек работась вятеви графикс коре, кой-кона объекттнень строямасна мольфтеви азф пинкнень инголязь. Но улихть стама ширет, конатненди шарфтома башка мяль. Республикань Оцюнясь отмечазе аэропортовай комплексть реконструкциянц мельге контрольть кемокснеманц эрявиксшинц. Тяниень пингть строительнай работатне тоса виияфтовсть, но срокнень эзда лядондома сякокс ули. Владимир Волков лятфтазе, што объктсь строяма тяддеть аделавомс – тяконь лувкссот и пассажирскяй терминалсь, и взлетнай полосась, и навигациянь систематне.
Стане жа, кода отмечазе Мордовиянь Оцюнясь, вишкоптомат работатне Саранскяень и Рузаевкань железнодорожнай вокзалонь пешеходнай сеттнень эса.
Мировой футбольнай первенствати анокламань инь важнай объктсь – 45 тежянь вастонди стадионць. Республикань вятись китькстазе «Мордовия Арена» стадионть эсь пингстонза строяманц башка значениянц. Тя объктса кой-кона работатне вятевихть графикть инголязь, но улихть лядондомат кровельнай пяльксть металлоконструкциянц монтаженц коряс. «Работатне тяса вишкоптомат, штоба сяда курокста машфтомс лядондомать», - мярьгсь Владимир Волков.
Оцю работа сави вятемс «Юбилейный» жилой комплексса, и сон стане жа пяшкодема тяддень кизоть аделамс. Корхтамась мольфтеви лама квартираса куттнень, социальнай инфраструктурань объекттнень строямаснон, территориятнень благоустройстваснон колга. Мордовиянь Оцюнясь китькстазе, што республикань руководствась аф атказакшни тя аймакса аквапарконь строямать коряс платтнень эзда. Тяниень пингть мольфтеви работа инвесторонь вешемать коряс, и объктсь ули строяф, но аф обязательна миронь чемпионатти.
Стане жа республикань Оцюнясь Владимир Волков шарфтозе оргкомитетонь члеттнень мяльснон ся ответственностти, кона путневи регионть лангс кода чемпионатонь организаторонь. «Конешна, Мордовиясь аф весть ни примсесь эсь ширесонза всероссийскяй и международнай оцю мероприятият, но мировой футбольнай первенствать етафтомац эсь масштабонц мархта аф путневи мархтост ряцок. И сембе должетт тянь шарьхкодемс», - китькстазе республикань Оцюнясь.
Сембе министерстватне и ведомстватне, конат отвечайхть мундиальти анокламать инкса, должетт виияфтомс работать эсь направленияснон коряс, лиякс синь руководительснон лангс примавихть кеме кадровай решеният.
Владимир Волков лятфтазе, што чемпионатти анокламать башка контроль ала кирдьсы сонць странань Президентсь В.В. Путин, сембе региоттне-организаторхне обязатт эрь ковня макссемс отчетт пяшкотьф работать коряс. 2018 кизонь чемпионатти Саранскяйть анокламанц коряс информациясь фалу должен пачфневомс и республикань Оцюняти – тяфтама поручения максфоль Правителствати оргкомитетть заседаниянц пингста.
Миронь чемпионатти анокламань программать пяшкотькшнеманц колга доклад тись Правительствань Председательть заместителец – Мордовия Республикань целевой программань министрсь Алексей Меркушкин.
Мордовия Республикань Оцюнять Пресс-службац