Мордовиянь Оцюнясь Владимир Волков азсь ризнамань валхт строяви кудса куцеманятнень срадомста шавфнень семьяснонды

Мордовиянь Оцюнясь Владимир Волков азсь ризнамань валхт строяви кудса куцеманятнень срадомста шавфнень семьяснонды

Мордовия Республикань Оцюнясь Владимир Волков азсь ризнамань валхт строяви кудса куцеманятнень срадомста шавфнень семьяснонды

Мордовиянь Оцюнясь Владимир Волков азсь ризнамань валхт Саранскяйса Фурмановонь ульцяса строяви лама этажса кудть эса куцеманятнень срадомста шавфнень семьяснонды.

Телеграмматнень эса, конат кучфт синь лемозост, корхтави:

«13 ноябрьста лиссь седиень ацергофты трагедия – Саранскяйса эрямань кудть строямста шавовсть республикань колма эряйхне: Равиль Хафизович Кокурин, Дмитрий Александрович Колесников и Светлана Станиславовна Гущина.

Тя трагедиясь минь марстонь мезьсовок аф пяшкодеви юмафксоньке, оцю ризнама Мордовиянь сембе эряйхненди. Шарьхкодьса, што аш валхт, конатнень мархта улель кода сетьмофтемс тинь. Минь ризнатама марса мархтонт. Вийхть теенть, ваймонь кемоши ня стака шитнень. Мон седиге ризнан шавфнень радня и мала ломаньцнон мархта. Стане жа мон ризнан Геннадий Александрович Цыгановонь семьянц мархта, кона тяниень пингть ащи больницяса. Арьсян теенза курокста пчкамс».

Региононь вятить поручениянц коряс примафт сембе мератне зиян алу повфненди и шавфненди материальнай лезксонь максомать коряс, тяконь лувксса калмаматнень анокламаса.