24 январьста Мордовиянь Оцюнясь Владимир Волков ульсь рабочай васедема мархта «Мордовцемент» ПАО-са (сувси «ЕВРОЦЕМЕНТ груп» холдинкти) Комсомольскяй поселкаса. Программань мероприятиятнень рамкаса ванфтольхть одкстоптф производственнай линиятне и етафтф совещания предприятиять работанц мархта сотф кизефкснень коряс. Совещанияса участия примась «ЕВРОЦЕМЕНТ груп» АО-нь директоронь Советть председателец Филарет Гальчев, «ЕВРОЦЕМЕНТ груп» АО-ть Президентоц Михаил Скорохода и «Мордовцемент» ПАО-ть генеральнай директороц Карела Оклештека. Республикань Оцюнять пингста кемокстафоль сервиснай соглашения «Мордовцемент» ПАО-ть и «General Electric (GE) компаниять еткса, конань эзда ульсь Россиять и СНГ-ть эзга фирмать директороц Руслан Пахомов.
Совещанияса, кона лемтьфоль предприятиять виияфнеманты, тифтольхть итокт 2016 кизонь работанцты, эздост шарьхкотькшневихть инголи тиф аськолксне ламоц показательхнень коряс. Республикань Оцюнясь отмечазе, што «Мордовцементсь» сембе эсь историянц пингста путни сатомшка оцю путкс странань и региононь экономикать виияфнеманцты, нолнемок тевс эсь работасонза тяниень пингонь технологиятнень.
«Тячи важна мрдафтомс Мордовцементть» республикань инголи моли промышленнай производстватнень еткс, конат макссихть эряеньконди оцю квалификациянь рабочай вастт и достойнай заработнай плата», - китькстазе Владимир Волков.
Филарет Гальчев отмечазень предприятиять модернизацияса 2016 кизоня тиф инголи аськолкснень и путсь коллективть инголе задача сяда тов кирдемс тя курсти, касфнемс производствать эффективностенц, сатомс 2017 кизоня 4,2 миллиотт тонна производствань объем.
Совещаниять шумордамда меле Мордовиянь Оцюнять пингста кемокстафоль 27 миллион долларонь питнеса пингта ингольдень сервиснай контракт «Мордовцемент» ПАО-ть и GE компаниять еткса. Соглашениять коряс 20 кизонь квалмоса кармай вятевома «Мордовцемент» ПАО-ть парогазовай электростанцияса ладяф GE –ть производстванц кафта турбинатнень сервиснай обслуживанисна.
Мордовиянь Оцюнясь Владимир Волков:
«Тячи кемокстафтольхть договоренносттне, конат тяда инголе сатфтольхть холдингонь руководствать мархта, 2017 кизоня 4 миллиотт 200 тежянь тоннат цементонь нолдамать коряс. Предприятияса ули сембось тя задачать решандаманкса – квалифицированнай работникт, тяниень пингонь оборудования, од технологият, эффективнай менеджмент. Важна и ся, што предприятиять руководствац етафни эряфс социальнай гарантиянь кели программа. Кемокстаф коллективнай договор, конань эса тяштьф, кодама социальнай гарантият максовихть «Мордовцементонь» работникненди. 2016 кизонь итокнень коряс средняй заработнай платась предприятияса пачкодсь 36 тежянь цалковайс – тя важнай фактор, кона корхтай «Мордовцементса» финансово-экономическяй ширеть вииякшнеманц колга. Тяда башка, тячи предприятиянь руководствать мархта сатф договоренность заводти транспортнай сообщениять ладяманц коряс. Кеман, што сембе арьсефсь «Мордовцементса» ули пяшкотьф».
«ЕВРОЦЕМЕНТ груп» АО-нь директоронь Советть председателец Филарет Гальчев:
«Мордовцементса» кафта кизонь работаньконь пингста тейнек удалась одкстоптомс предприятиять пцтай сембе производственнай мощностензон, примамс оцю план карьерть арьсеманц коряс, конань эса мяльс сявфт экологическяй безопасностсь и тевс нолневи сырьять качествац. Полафтфт 17 вайгяльбень квалмоса машинань китне и 44стрелочнай переводсь, цебярьгофтф предприятиять территорияса транспортнай логистикась. Тячи «Мордовцементса» работай 1 200 ломань, мекольдень кафта кизотнень трудть производительностец кассь кафтонь-крда. «Мордовцементсь» - эсь лацонь предприятия, тяса муст васта цементть производстванц коряс тячиень шити масторлангса уликс сембе технологиятне. Азан благодарностень валхт республикань руководствати проектоньконь ширеснон кирнеманкса, эвондакшни сембе кизефкснень оперативнайста решандакшнеманксост. Кеман, што «Мордовцементть» инголи путф сембе задачатне улихть пяшкотьфт – потребительхне получайхтьцебярь качествань продукция, регионть бюджетс эсь пингстонза поступайхть налоговай отчислениятне, предприятиянь работникне обеспечендавихть соцгарантияса и оцю заработнай платаса».