Мордовиянь Оцюнясь Владимир Волков 20 июньцта етафтсь рабочай васедема Роспотребнадзорть вятиенц Анна Поповать мархта. Корхтамась мольфтевсь республикать территорияса санитарно-эпидемиологическяй благополучиять обеспечендаманц колга, тяконь лувксса футболть коряс миронь чемпионатть етафтомста.
Надзорнай ведомствань оцюнясь макссь оцю оценка международнай турнирти региональнай власттнень анокламаснонды. «Ошсь пяк цебярь, няеви лац, сембоса приметави мельганза якамась и заботендамась. Ули кода азомс, што Саранскяйсь пяк лац аноклась миронь чемпионатти», - мярьгсь Анна Попова.
Стане жа Роспотребнадзорть вятиец китькстазе, што аф няи перяфкст сянди, штоба государственнай границать туркс нолдамань пунктсь, кона чемпионатть пингста ладяф Саранскяень аэропортса, араль сембе пингоннекс. «Тячиень шити мзярошка пингонь терминалса улихть сембе условиятне, штоба обеспечендамс сембе эрявикс санитарно-карантиннай мероприятиятнень», - отмечазе надзорнай ведомствань оцюнясь.
Мордовиянь Оцюнясь Владимир Волков китькстазе, што республиканскяй власттне работайхть Роспотребнадзорть мархта кеме сотксонь кирнезь и курокста сявондьсазь мяльс сембе замечаниятнень.
Башка мяль рабочай васедемаса шарфтфоль чемпионатть пингста лама ломанень пуропни васттнень эса питаниять обеспечендаманцты.
Васедемаса примасть участия Мордовия Республикань Правительствать Председателец Владимир Сушков, Правительствань Председательть заместителец Галина Лотванова, республикань здравоохранениянь министрсь Михаил Морозов, Мордовия Республикать эзга Роспотребнадзорть вятиец Татьяна Харитонова.
Мордовия Республикань Оцюнять пресс-службац