21 декабрьста Мордовиянь Оцюнясь Владимир Волков Москуса етафтсь несколька рабочай васедема республикать социально-экономическяй вииякшнеманц мархта сотф кизефкснень коряс.
Правительствань Кудса ульсь васедема Правительствань Председательть заместителенц Виталий Мутконь мархта. Корхтафоль 2018 кизонь футболть коряс миронь чемпионатонь мероприятиятнень и целайнек анокламань программать финансированияснон мархта сотф кизефкснень коряс. РФ-нь спортонь министрть Павел Колобковонь мархта республикань Оцюнясь корхтась 2016 кизонь итокнень коряс спортивнай объекттнень строямаснон финансированиянь программать шумордаманц колга, стане жа ванфтольхть республикань спортивнай сферать вииякшнемаса перспективнай ширетне.
Российскяй Федерациянь Правительствань Председательть заместителенц Дмитрий Козакть мархта васедемаса корхтафоль Мордовияса эряфс етафневи «Молодая семья» жилищнай программать финансированиянц и строительствань государственнай лия программатнень эса республикать участвондаманц колга.
Стане жа Мордовиянь Оцюнясь васетькшнесь РФ-нь строительствань и жилищно-коммунальнай хозяйствань министрть Михаил Менень мархта. Корхтамась мольфтевсь «Молодая семья» программать эряфс етафнеманц и «Юбилейный» ЖК-нь омбоце микрорайононь строямань перспективнай платтнень колга, тяка лувксса идень саттнень и поликлиникать строямасна. Ня и лия проекттнень квалма Владимир Волков мольфтсь корхтама РФ-нь строительствань и жилищно-коммунальнай хозяйствань министрть заместителензон Елена Сиэррань и Никита Стасишинонь мархта.
Тяка шиня Мордовия Республикань Оцюнясь васетькшнесь Российскяй Федерациянь образованиянь министрть Ольга Васильевать мархта. Корхтафоль республикаса образованиянь сферать вииякшнеманц мархта сотф кизефкснень, федеральнай проекттнень эса Мордовиять участвондаманц, а стане жа 2018 кизонь футболть коряс миронь чемпионатти анокламаса марстонь работать коряс.
Тяка лувксса корхтафоль од школань строямань проекттнень колга – 450 вастонди Краснослободск ошса и 800 вастонди Рузаевка ошса, а стане жа 2018 кизонь миронь чемпионатть рамкаса студенческяй общежитиятнень строямаснон и реконструкцияснон квалма. Ванфтольхть уроз иттнень эряма вастса обеспечендамаснон коряс кизефксне, а стане корхтафоль школьнай од автобусонь рамамать колга, тяка лувксса федеральнай бюджетста дополнительнай средстватнень вельде. Владимир Волков азсь благодарностень валхт Ольга Васильевати образовательнай сфераса инь эрявикс проекттнень ширеснон кирнеманкса и тердезе самс Мордовияв рабочай визит мархта.
Васедематнень эса участия примась Мордовиянь Правительствать Председателец Владимир Сушков.