Мордовиянь Оцюнясь Владимир Волков етафтсь республикаса санитарно-эпидемиологическяй ситуациять коряс совещания

Мордовиянь Оцюнясь Владимир Волков етафтсь республикаса санитарно-эпидемиологическяй ситуациять коряс совещания

Мордовиянь Оцюнясь Владимир Волков 5 июньцта етафтсь рабочай совещания Правительствань члеттнень и муниципальнай райононь оцюнятнень мархта. Корхтамась мольфтевсь республикаса санитарно-эпидемиологическяй ситуациять колга.

Республикань Оцюнясь китькстазе, што эпидемиологическяй обстановкась республикаса лядонды стакакс. Тяка пингть ограничительнай мероприятиятне, конат азфт МР-нь Оцюнять Указонц эса, пяшкотькшневихть республикань райоттнень эса аф фкя лаца. Кой-кона населеннай пункттнень эса ломаттне лафчептозь самоизоляциянь режимть. Но республикась нинге аф анок лисемс ограничениянь валхтомань васенце этаптивок, сяс мес стаки касонды урмаськодыхнень лувкссна.

«Лафчемкшнемс нинге рана! – мярьгсь Владимир Волков. – Москуть лангс ваномс тейнек аш месть – тоса тя ушедсь колма недяляда сяда инголи. Мон шарьхкотькшнеса, што сембе сизесть, но эряви сявондемс мяльс ся ситуациять, кона миньцонк ули».

Мекольдень недялятнень республикаса кассь аф больничнай пневмониятнень лувкссна, мезть специалисттне сотнекшнесазь самай сянь мархта, што ломаттне лоткасть лац-ряц ванфтомда пря. Кода результат – медицинскяй учреждениятне работайхть тяниень пингть мекольце вийса.

Кода азозе Мордовиянь Правительствать Председателенц заместителец Галина Лотванова, мекольдень суткатнень республиккаса скораень станцияв аньцек ОРВИ-тнень, пневмониятнень и ковидть кряс поступась 271 вызов. Тячиень шити аноклаф 1680 инфекционнай васта, тя ся пингть, мзярда нормативсь 395 васта. Фкя инь васенце прябалась тяфтама курокста сярядихнень касомста – медицинскяй кадратнень аф сатнемасна.

«Врачне миньцонк работайхть грамотнайста, но кда минь минць аф карматама вятема пряньконь грамотнайста – врачне аф кирдихть. Вастт панчсемс можна, но вдь васенцесь – што тейнек эрявихть специалист» - китькстазе Владимир Волков.

Урмаськотфнень еткса лама 65 кизоса и сяда сире ломаньда, конатненди васендакиге эряви кирдемс самоизоляциянь режимсь. Аф стак теест кувалгофтфтольхть больничнай лопатне 11 июнть самс. Оцю пелькссь тяни иттнендивок.

«Кизоть саманц мархта минь няйсаськ кода кассь сяряди иттнень лувкссна, - азозе МР_ть эзга Роспотребнадзоронь Управлениять вятиец Татьяна Харитонова. – Но налхксемань площадкатне куттнень маласа тяниень пингть пяшксет шабада. Кда аф пяшкотькшнемс профилактическяй мератнень, миньцонк кармай пяк лама сяряди идьта, тяконь лувксса аф больничнай пневмонияса».

Владимир Волков кошардозень райононь оцюнятнень кемокстамс ограничительнай мератнень пяшкотькшнемаснон мельге ваномать. Башка мяль эряви шарфтомс транспортса, рабочай коллективса, мишенедемань васттнень эса санитарнай вешфкснень пяшкодемаснонды. Тянь эзда кармай ащема, кодама курокста республикати удалай маладомс ограничениянь валхтомань васенце этапти. Эряви лятфтамс, што ламоц региоттненди, конат эряскодсть тянь мархта, савсь оду мрдамс ингольдень ограничениятненди сярядихнень лувксснон касоманкса.

 

Мордовия Республикань Оцюнять пресс-службац