Мордовиянь Оцюнясь Владимир Волков 8 июньцта видеоконференциянь режимса етафтсь келептьф совещания 2020-2021 кизонь сексень-тялонь пингти анокламать коряс. Эсонза примасть участия республикань Правительствать членонза, муниципальнай райононь оцюнятне, ресурсоснабжающай организациятнень вятисна.
Азфоль, што уштомань етай сезонць етась целайнек аф кальдявста, но кассь аварийнай ситуациятнень лувкссна – кафтонь-крда, и тя эвондафни таколдома. Васендакиге тя канневи Саранскяйти, тяса инь ламоль аварийнай ситуацияда водо- и теплоснабжениянь сетьтнень эса. Кода результат лямбофтома мзярошка пингс лядондсть лама квартираса 615 кудсь. Кода китькстазе Владимир Волков, тя лиссь сяс, мес кальдявста работасть ресурсоснабжающай организациятне, васендакиге «СаранскТеплоТранс», «Саранскгорводоканал» предприятиятне.
Уштомань од сезонти анокламанкса республикань Оцюнясь путсь несколька задача. Васендакиге, муниципалитеттненди марса энергоснабжающай организациятнень мархта эряви ламонь-крда касфтомс работань объемтнень: пуроптомс материально-техническяй ресурсонь, электроснабжениянь и топливань аварийнай резерва, анокламс аварийнай бригадатнень, козякофтомс синь эрявикс специалистса, связень средстваса, техникаса и оборудованияса. Анокламань работатненди, арьсекшневи, ули карьхцяф 3 миллиартт цалковай. Аньцек электроэнергетикань сфераса тядде арьсеф етафтомс эряфс 9 инвестиционнай программа, марстонь финансированиясь пцтай 900 миллион цалковай. Сяс работамс эряви кафта сменаса, нолямс тевс сембе ресурснень. Мзярс работатне мольфтевихть аф стама вишкста, кода вешеви.
«Ваныне Саранскяйть и няине, што лама шувф теплотрассада, но пялеснон эса кивок аф работай! Тянь нолдамс аш кода! – мярьгсь Владимир Волков. – Кда ушедость ремонтть, эряви сонь сяда курокста шумордамс, штоба сяда курокста максомс ломаттненди лямбе ведь».
Республикань Оцюнясь китькстазе, што сексень-тялонь пингти анокламста васенце вастти лихневи синь диагностикасна.
«Сембе инженернай сетьтненди диагностикань тиеманкса минь раматама муниципальнай предприятиятненди специальнай техника, тянкса улихть сембе возможносттне – лизинг, льготнай условияса. Тейнек эряви содамс, коса и мезе миньцонк может сязевомс, штоба эсь пингстонза машфнемс тя прябалатнень, а аф шувондомс территориятнень и лоткафнемс пяле микрорайононь», - мярьгсь Владимир Волков.
Фкя инь васенце прябалакс уштомань сезонти анокламста азфтольхть энергоресурснень карьхцяманкса расчеттне. Сембе потребительхнень, тяконь лувксса бюджетнай учреждениятнень шумосна касондыхть и тячиень шити арасть пцтай 4,5 миллиард цалковай. Тя прябалать решандаманкса Финансонь министерствати максф поручения анокламс коммунальнай ресурсонкса республиканскяй и муниципальнай бюджетнай учреждениятнень шумоснон пандомаснон коряс эрь шинь пандомань график.
Тяка пингть местнай самоуправлениянь оргаттненди марса ресурсоснабжающай организациятнень и управляющай компаниятнень мархта эряви решандамс задачась лама квартирань куттнень и социальнай объекттнень эса учетонь приборхнень ладямаснон коряс. Тяконь лувксса ресурсонь ванфтомань интеллектуальнай систематнень тевс нолязь, кода АСКУПЭ-сь. Эряви азомс, што Саранскяйса АСКУПЭ-ти подключандафоль пцтай 2 тежятть куд, но тяни системать эса лядсь аньцек 1200 куд. Мекольдень кафта кизотнень тя работась мольфтеви сяда саворста, и тяса кода можна сяда курокста тиема порядка.
«Ломаттне должетт пандомс аньцек ся ресурснень инкса, конатнень синь афкукс получсесазь. Именна тяфтама принцип путф АСКУПЭ системать эса, - китькстазе Владимир Волков. – Ломаттненди аш мезенкса паннемс ресурсоснабжающай организациятнень афсатыксснон инкса».
Региональнай Правительствати марса райононьи Саранск ошень администрациятнень мархта Мордовиянь Оцюнясь стане жа макссь поручения арьсемс-сьмекамс коммунальнай ресурсонкса пандоматнень «явфнемаснон» коряс механизмать республикаса тевс сувафтоманц.
Владимир Волков мярьгсь, што ЖКХ-ть одкстопнемаса тевс нолямат «еню» технологиятне, цифровой решениятне. Эряви полафнемс коммунальнай хозяйствать мархта управлениянь структурать, тиендемс сонь сяда тяниень пингоннекс, кирьфнемс бюджетнай карьхцьнень управленческяй и техническяй персоналть кирдеманкса. Тянкса Саранскяень и райононь администрациятненди эряви ваномс кизефксть ЖКХ-нь объекттнень обслуживанияса, территориятнень благоустроендамаса, жилищнай фондть мархта управленияса марстонь учреждениять панжеманц коряс, кона пуроптсыне марс уликс муниципальнай предприятиятнень.
Владимир Волков китькстазе, што уштомань пингти анокламать коряс сембе работатне эрявихть шумордамс тяддень 1 сентябрть самс.
Мордовия Республикань Оцюнять пресс-службац