Мордовиянь Оцюнясь Владимир Волков етафтсь совещания «Мордовия Арена» стадионца

10 февральста Мордовиянь Оцюнясь Владимир Волков етафтсь выездной совещания «Мордовия Арена» стадионть стройплощадкасонза, коса участия примасть строямать генеральнай подрядчикоц – «ПСО Казань» ООО-ть генеральнай директороц Равиль Зиганшин, заказчикнень  – «Спорт-Ин» ФГУП-ть и «Арена 2018» АНО-ть представительсна.

Ванфтольхть «Мордовия Арена» стадионть, «Тавла» жилой комплексть строямаснон мархта сотф инь оржа кизефксне, а стане жа корхтафоль стадионть маласта Инсар ляйть трванц тиеманц-петеманц колга.

Тяниень пингть «Мордовия Арена» стадионца педа-пес шумордаф основной зданиять строямац, мольфтевихть отделочнай работатне, потмоширдень инженернай стенатнень, а стане жа основной металлоконструкциятнень  монтажсна. Латцефт футбольнай паксянь плитатне, наружняй водопроводонь и канализациянь монтажть коряс работатне пяшкотьфт 90 процентта. Тяка пингть кой-кона тефнень коряс работась сяда виияфтома. Республикань Оцюнясь башка отмечазе объектть строямань пингонзонды кирнемать эрявиксшинц, штоба эсь пингстонза кярьмодемс футбольнай паксять тишень вельхксонц ладяманцты.

Работатнень мольфтемаснон ваномста корхтафоль стадионть лангань отделканц мекольдень дизайнанц квалма, мяль шарфтфоль акшаза-оранжевай тюсти. Стадионць Саранскяйса кармай маласькофневома шити, кона канды лямбе и цебярь мяльхть-арьсемат сембонди.

Тяда башка, путфтольхть задачат «Тавла» гостинично-жилой комплексса работатнень вишкоптомаснон, эрявикс строительнай материалхнень пачфнемаснон и рабочайхнень лувксснон касфнемаснон коряс.

Стане жа совещанияса корхтамась мольфтевсь «Мордовия Арена» стадионть маласта Инсар ляйть трванц кемокснеманц коряс. Тячиень шити кантф кабельнай линиясь, кона мольсь строительнай площадкать территориянц эзга, мольфтевихть мероприятият ляйть трванц рельефонц обработканц коряс. Объектти пачфтьф шпунтовай перяфкс, вятевихть работат упорнай брусть и сонь бетонированиянц коряс. Ванфоль стадионть ширде Инсар ляйть маласта территориять благоустройстванц коряс, кона должен арамс 300 метрань кувалмоса ваймосемань зонакс – лама уровенень променад, велосипеднай киня, идень налхксемань городок, скейтбордистонди площадка мархта.

Совещанияса участия примасть Мордовия Республикань Правительствать Председателец Владимир Сушков и сонь заместителенза, конат вятьсазь 2018 кизонь чемпионатти анокламань кизефкснень.

Мордовия Республикань Оцюнять Пресс-службац