Мордовиянь Оцюнясь Владимир Волков етафтсь совещания муниципальнай райононь оцюнятнень мархта

Мордовиянь Оцюнясь Владимир Волков етафтсь совещания муниципальнай райононь оцюнятнень мархта

Вержиста, 22 мартста, Республикань Кудса Владимир Волков етафтсь расширеннай совещания, коса примасть участия республикань муниципальнай райононь оцюнятне и экономикать и социальнай сферать виияфнемаснон мархта сотф кизефкснень коряс властень оргаттнень представительсна. Корхтафоль 2016 кизонь итокнень и тядденди задачатнень колга. Республикань Оцюнясь шарфтсь мяль инь пичефти кизефкснень лангс, конат вешихть курокстонь решандама и башка контроль.

Меля экономикань отраслятнень эса и социальнай сфераса инголи молемась ванфтовсь и 2017 кизоть ушетксста.

«Тяддень кафта ковста работань результаттне макссихть надияма, - отмечазе Владимир Волков. – Башка тя няеви промышленностть коряс: кда 2016 кизоть промышленнай производствань индекссь республикаса ульсь 100,5 процент, то тяддень январьста-февральста – 117 процент».

Оцю сатфкст удалась сатомс меля велень хозяйстваса.  Сядонга оцю задачат путни аграрийхнень инголе республикань Оцюнясь тядде, - кочкамс аф 330 тежянь тоннада кржа сера, 1 миллион 100 тежянь тонна сахарнай якстеряпс, витцеви площаттнень касфтомс 713 тежянь гектарс. Башка отмечафоль  жувататнень лувксснон  касфтоманц эрявиксшиц – аф аньцек общественнай стадать, но и  частнай хозяйстватнень эса.

Стане жа азфоль, што муниципальнай образованиянь оцюнятнень работаса оцю мяль шарфтома «инвестиционнай паспорттнень» анокламаснонды, коса няфтемат районть территорияса уликс шава инвестиционнай сембе площадкатне. « Документальна оформляндаф предложенияфтома республикась кармай юмафнемост потенциальнай инвесторхнень, а тянь нолдамс аш кода!» - китькстазе Владимир Волков.

Кда корхтамс строительствать колга – тяда инголе эряфс етафневи программатне, конатнень коряс республикаса стройсевсть и ремонтировандакшневсть эряма васттне, школатне и идень саттне, поладовихть 2017 кизонявок. Башка мяль шарфневи эряма вастонь строямати. « Тейнек аф нолдама эряма вастонь строямать киремац – тя пяк важна республикань эряйхненди. Ков сяда лама доступнай эряма васта строяви регионца, тов сяда кржа ули тяста тушендыда», - китькстазе Владимир Волков.

Эряви азомс, што Мордовияса эряма вастонь строямать касфнемац, тяконь лувксса 5 процент алу льготнай ипотекать тевс нолнезь, кона поладовсь 2017 кизоть аделамс, лездсь касфтомс республикань эряйхнень лувксснон. Кепотьксонди, миграционнай касомась тяддень кафта ковста пачкодсь 4,5 тежянь ломаньц.

Владимир Волков путсь задача цебярьгофтомс строяви объекттнень качестваснон и аф лядондомс строямань графикть эзда. Мяльса васендакиге кирдеви граждаттнень аварийнай и сире эряма васттнень эзда етафтомасна, а стане жа жилой фондть капитальнай ремонтоц. Тядде  лама квартираса 206 кудти капитальнай ремонтонь тиеманкса республикаса нолдаф 518 миллион цалковай.

Стане жа республикань Оцюнясь отмечазе, што социальнай и бытовой инфраструктурась од микрорайоттнень эса должен вииякшнемс фкя пингста эряма вастонь строямать мархта. «Куд перьфнень благоустройствасна, китне, магазиттне, идень саттне, общественнай транспортсь – сембе ня кизефксне решандакшнемат эсь пингстонза», - китькстазе Владимир Волков.

ЖКХ-нь сфераса Владимир Волков макссь поручения муниципальнай райононь оцюнятненди кирдемс личнай контроль ала сембе пичефти кизефкснень, башка - работань заказчикнень и подрядчикнень еткса соткснень. Сидеста, кода отмечазе республикань Оцюнясь, подряттнень получсесазь управляющай компаниятнень вятиснон радня ломаньцна, тяста – работатнень кальдяв качествасна, конань инкса кивок аф кирди ответственность. Региононь Оцюнясь мярьгсь тиемс порядка тя сфераса и касфтомс населенияти макссеви услугатнень качестваснон.

Корхтамок республикаса вииякшнемань социальнай и экономическяй программатнень федеральнай бюджетть лезксонц вельде эряфс етафнемаснон колга, Владимир Волков китькстазе Президентть майскяй Указонзон эсь пингстонза примамаснон и эффективностьснон: «Синь лездсть нюрьхкяня пингста решандамс сембе региоттнень эса, тяконь лувксса и Мордовияса, инь оржа, инь таколфты кизефкснень».

Мордовия Республикань Оцюнять Пресс-службац