Мордовиять Россияса фкя инь оцю международнай гостиничнай операторть мархта сяда товолдонь сотрудничестванц колга корхтафоль 21 мартста Республикань Кудса. Региононь вятись Владимир Волков етафтсь васедема Россияса и СНГ-нь странатнень эса Accor компаниять генеральнай директоронц Алексис Делароффонь мархта.
Лятфтасаськ, Саранскяйса 2018 кизонь футболть коряс Миронь чемпионатти строяви Mercure международнай брендть ала, конань азороц Accor компаниясь, 115 номеронди ниле тяштень отель. Гостиницась строяви Коммунистическяй и Большевистскяй ульцятнень фкя-фкянь туркс етамань вастсост. Мундиальть пингста эсонза арьсекшневи эряфтомс фкя командать-участницать.
Кода отмечафоль васедемать пингста, строямась мольфтеви графикс коре. Тячиень шити объектть анокшиц пачкотькшни 65 процентс, 2017 кизонь сексети сон эряви сувафтомс тевс.
Алексис Деларофф надияфтсь Владимир Волковонди, што отельсь кармай отвечама инь оцю стандарттненди, и Мордовиясь кармай маряма гордость тяфтама уровенень гостиничнай объектть инкса.
Республикань Оцюнясь, эсь ширденза, китькстазе, што миронь чемпионатти инфраструктурать строямац лезды касфтомс республикав сашенды туристтнень лувксснон и виияфнемс регионца экономикать.
Васедемаса примасть участия Мордовия Республикань Правительствать Председателенц заместителец – целевой программань министрсь Алексей Меркушкин, строямать генеральнай подрядчиконц, «Анелия» ООО-ть руководствац.
Мордовия Республикань Оцюнять Пресс-службац