Мордовиянь Оцюнясь 16 майста примась участия республиканскяй совещанияса, кона лемтьфоль футболть коряс миронь чемпионатти правоохранительнай оргаттнень анокшиснонды. Совещаниять вятезе РФ-нь внутренняй тевонь министрть васенце заместителец Александр Горовой.
Республикань Оцюнясь пачфтезе министрть заместителенцты, што мировой первенствати анокламасаа Мордовиясь лиссь финишняй прямойти. Панчф од аэропорт, одкстоптфт машина кинь вокзалхне, анокт дорожнай и гостиничнай инфраструктуратне, тренировочнай площадкатне, электро-, тепло-, водоснабжениянь объекттне. Аноклаф базась командатненди, мольфтеви оцю работа эряма куттнень фасадснон и куд пирьфнень благоустроендамаснон коряс.
Владимир Волков отмечазе, што марса внутренняй тевонь оргаттнень мархта решандакшневи лама кизефкс дорожнай движениянь безопасностть обеспечендаманц коряс. Тяка пингть башка мяль шарфневи антитеррористическяй аралафшити.
Стане жа отмечафоль, што чемпионатть етафтомста личнай составсь етафтови службань кирдемань виияфтф режимс. Арьсекшневи нолдамс тевс «Безопасный город» аппаратно-програмнай комплексть. Васендакиге, тя видеонаблюдениянь систематне, пожарнай сигнализациясь, а стане жа оповещениянь систематне Саранскяйса, стадионца, перехватывающай парковкатнень и ФАН-зонать эса. Стане жа 1 июнть самс республикать сембе территориясонза нолдави промышленнай эксплуатацияс «Система-112».
21 апрельста и 4 майста «Мордовия арена» стадионца етафтфтольхть тестовай васенце матчне, конатнень эса тевса варжафтольхть транспортнай и медицинскяй обеспечениясь, питаниясь и связсь, волонтерхнень,
стюарттнень, контролерхнень-распорядительхнень, охраннай организациянь сотрудникнень работасна. Тестовай колмоце матчть пингста стадионць кармай пяшкотьф педа-пес.
Республикань Оцюнясь азсь кемама сянди, што правоохранительнай оргаттнень лац ладяф работасна миронь чемпионатть пингста обеспечендасы Мордовиянь эряйхнень и инжихнень безопасностьснон.
Мордовия Республикань Оцюнять пресс-службац