29 ноябрьста Мордовиянь Оцюнясь Владимир Волков примась участия торжественнай мероприятияса, кона лемтьфоль Всероссийскяй илати – Тядянь шити, кона етась Республикань Кудть Оцю залсонза.
«Тячи минь пара койс коре етафтсаськ фкя инь эрявикс, и тяка пингть лямбе и таколфты васедемать. Ноябрь ковонь мекольце недляшиня Россияса отмечсеви Тядянь шись. И тяни, торжественнай обстановкаса, мон пара мяльса приветствовандатядязь тинь республиканьконь фкя инь главнай залсонза, - мярьгсь В.Д.Волков. – Сембе тинь кода аш кивок лац содасасть семьянь питнешитнень, мала ломаттнень ширде заботендамать. Именна семьяса шабась тонафтови нравственностти, теенза макссевихть обществать мархта пуроптф духовнай питнешитне. Именна тядятне-алятне водендакшнесазь сонь созидательнай тевонь тиема. Тяса путневи ушеткс ломанть сай пингонцты, сонь личнай качестванзонды, обществаса вастонцты, сонь гражданскяй позициянцты».
Тяниень пингть республикаса лама тиендеви семьять престиженц касфнеманкса, семейнай питнешитнень кемокснеманкса, макссеви моральнай и материальнай лезкс шаба мархта семьятненди, башка лама иденнетненди.
Мордовияса тевс сувафтф республиканскяй тядянь капиталсь колмоце и сяда товолдень иттнень шачеманкса. Тядде тя капиталти тиф индексация и тяни сонь лувксоц пачкодсь 125 тежянь цалковайс колмоце шабать шачемда или усыновляндамда меле, 150 тежянь цалковайс – нилецеть инкса и 187 тежянь цалковайс – ветецеть и сяда товолдонь шабатнень инкса. Азома, што тядянь капиталсь панневи эрь шабать инкса. Сяда тов тя средстватне прважсевихть эрямань условиятнень цебярьгофтоманкса, шабати образованиянь получаманкса или тядять пенсионнай обеспечендаманц инкса. Тя праваснон тевс нолдазь ни пцтай 900 семьясь.
Республикаса аф кржа тиендеви лама идень семьятнень эрямань условияснон цебярьгофтоманкса: педа-пес панневи ипотечнай кредитть лядыкс пяльксоц нилеце итть шачемста, а колмоцеть шачемста пандови лядыкс пяльксть 30 процентоц. Тяда башка, ладяф эрь ковонь ярмаконь пандома студенческяй семьятнень ширеснон кирдеманкса, коса касфтовихть шабат. Тячи тя пандомать лувксоц пачкотькшни 8 тежянь цалковайс.
Стане жа республикаса ладяф эрь ковонь пандома колмоце и сяда товолдонь шабатнень шачемста, мзярс идти аф топодихть колма кизот. Сонь лувксоц стане пачкотькшни 8 тежятть цалковайс. Тядде тя пандомать получсесазь 2800 шабась.
Тяда башка, семьятненди, коса касфтовихть колма и сяда лама шаба, макссевихть модань участкат эряма вастонь строяманкса и личнай подсобнай хозяйствань вятеманкса.
«Отмечаса, што аньцек мекольдень вете кизотнень аф фкя лацонь программатнень коряс республикась нолдась средстват эряма вастонь условиятнень цебярьгофтоманкса 500 лама идень семьянди, - азозе Владимир Волков. – Эрь кизоня ашу семьятненди макссеви материальнай лезкс Очижити и 1 сентябрти. Тядде тя лезксть получазь 3,5 тежяньда лама семьясь, конатнень эса воспитандави 8 тежятть шаба. Пара койс коре, кода и тяда ингольдень кизотнень, республикань 90 тежянь шабась получсихть ламбама казнет Од кизоти».
Башка мяль регионца шарфневи иттнень ваймосемаснонды и шумбрашиснон петнеманцты. Итненди, конатненди башка эрявикс государствать ширде заботендамась, макссевихть питнефтома путевкат шумбрашинь петнемань лагерьхненди и лечебно-оздоровительнай учреждениятненди. Тядде петемс шумбрашиснон государствать лезксонц вельде удалась 40 тежянь шабанди.
Праздниконь карша Мордовияста Бутарефнень семьясна занязе омбоце вастть од семьятнень I Всероссийскяй форумснон «Лучший проект по раскрытию семейного потенциала у молодых семей» номинациясонза, кона ульсь Ростов-на-Дону ошса. Семьять планца – пажемс Саранскяйса семейнай лагерь, шабатненди и родительхненди специальнай клуб.
2011 кизоста сявомок родительхненди, конат касфтыхть ниле и сяда лама шаба, казендеви «За заслуги в воспитании детей» Мордовия Республикань Оцюнять Почетнай дипломоц и фкя пингонь ярмаконь премия. Сембоц тя дипломть получазь ни 119 семьясь.
Кемонь кизода инголе кармась казендевома лама идень тядянь Почетнай дипломсь, конань ули несколька льготац и материальнай вознагоражденияц. Тяфтама дипломса казьфт ни республикань 471 авась.
«Кеняртьфти, што мекольдень вете кизотнень кирсь шабатнень лувкссна, конат касфтовихть аф семьяса. Тя пингста 320 шабась музь приемнай родительснон. Нинге тняроти сави кочкамс семья.», - мярьгсь Мордовиянь Оцюнясь.
«Мекольдень кизотнень коль касонды одс шачихнень лувкссна. И мезсь сядовок эрявикс, миньцонк кизоста кизос касонды ся шабатнень лувкссна, конат шачсть семьяса омбоцекс, колмоцекс и сяда товолдоннекс. Тя показательсь няфнесы ломаттнень вандыень шити, Мордовиять вииякшнеманцты верондамаснон, - китькстазе Владимир Волков. – Кода содаф, оцю семьятнень эса сяда лама сталмода, но и паваздовок сяда лама. Надиян, што кизоста кизос тя валда илась арай «профессиональнайкс» коль сяда лама аванди. Седи ваксста арьсян теенть и тинь семьянтенди шумбраши, благополучия и паваз! Катк мархтонт фалу ули церантень и стирентень кельгомасна и заботендамасна! Катк сай кизось канды теенть лямбе и цебярь настроения! Катк сон ули павазукс тинь семьянтенди, а иденте катк фалу каннихть теенть кенярдема! Мир, цебярь и паваз тинь кудонтенди»!
Мероприятиянь участникне азондсть благодарностень валхт республикань руководствати и лична МР-нь Оцюняти Владимир Волковонди сембе ширдень лезксонкса и заботендаманкса.
Отмечасаськ, што торжественнай церемониянь сембе участницатнень учендозень кеняртьфти казне.Мордовия Республикань Оцюнять Администрациянц лезксонц вельде етафтфоль «День красоты» благотворительнай акциясь. Сонь рамкасонза 20 лама идень тядяти тифтольхть макияж и прическат, максфтольхть профессиональнай советт эсь мельга якамать коряс. Мазышинь секретснон лама идень тядятненди азозь визажисттне Екатерина Никишина, Яна Чернецких, Татьяна Третьякова, а стане жа прическатнень коряс стилисттне Кристина Лукьянова и Светлана Малофейкина.
Традицияс коре пуромксонь сембе участницатненди Мордовиянь Оцюнять лемста казьфтольхть павлопосадскяй руцятне, торжественнай церемониять шумордамда меле сембе казьфне тусть илань обедс.