Мордовиянь Оцюнясь Владимир Волков кирдезе Саранскяйса русскяй классическяй гимназиять панжеманц коряс проектть ширенц

Мордовиянь Оцюнясь Владимир Волков 17 февральста етафтсь рабочай васедема юстициянь Всероссийскяй государственнай университетть (Россиянь Минюстть РПА-ц) ректоронц Ольга Александровать мархта.

Корхтамась мольфтевсь университетть Саранскяй филиалонц виияфнеманц колга. Ольга Александрова отмечазе учебнай заведениять оцю уровененц, китькстамок, што сон сувси вузонь колма инь цебярь филиалхнень лувксс.

Тядде юстициянь университетсь нолдасы тевс эстеенза од проектть – институтонзон видеса русскяй классическяй гимназиятнень панжемаснон. Пилотнай регионкс арайхть Москусь, Саранскяйсь и Ростов-на-Донусь.

Мордовиянь Оцюнясь Владимир Волков азозе, што кирдьсы университетть инициативанц. Региононь вятись макссь порученият республикань Правительствати од образовательнай учрежденияти вастонь максомать коряс.

Рабочай васедемаса примасть участия Мордовиянь Правительствать Председателенц заместителец Галина Лотванова и юстициянь Всероссийскяй государственнай университетть васенце проректороц Дмитрий Гурьев.

Мордовии Республикань Оцюнять Пресс-службац