Мордовиянь Оцюнясь Владимир Волков корхтась 2018 кизонь чемпионатти и «Мордовия Арена» стадионца тестовай колмоце матчти анокламать колга

Мордовиянь Оцюнясь Владимир Волков корхтась 2018 кизонь чемпионатти и «Мордовия Арена» стадионца тестовай колмоце матчти анокламать колга

14 майста Мордовия Республикань Оцюнять рабочай шинц оцюшка пяльксоц сотфоль футболть коряс Миронь чемпионатти и «Мордовия Арена» стадионца тестовай колмоце матчти анокламать мархта.

Шить васенце пялестонза республикань Оцюнясь Владимир Волков примась участия видеоконференцияса, конань етафтозе Россиянь Правительствать Председателенц заместителец Ольга Голодец. Корхтамась мольфтевсь ошнень-организаторхнень – конатнень еткса и Саранскяйсь – мировой футбольнай первенствати анокшиснон колга. Корхтафоль медицинскяй обеспечениянь кизефкснень колга, санитарнай законодательствань вешфкснень мяльс сявондемаснон квалма, а стане же сервеснай сембе службатнень стадионца работамаснон колга, тяконь лувксса сятнень, конат отвечайхть стадиону сувамать, питаниять и волонтерскяй программать инкса.

Видеоконференциять аделавомда меле Владимир Волков етафтсь расширеннай совещания, коса примасть участия миронь чемпионатти анокламаса заняф организациятнень, службатнень и ведомстватнень вятисна.

Васендакиге ванфтольхть афсатыксне, конат лихтьфтольхть аф фкя лацонь службатнень работаса «Мордовия Арена» стадионц васенце кафта матчнень етафтомста. Синь сотфт стадионть эзга ломаттнень етамаснон, питаниять организациянц, ванфтомань камератнень работаснон, арушить и порядкать мархта. Тяда башка, азфоль аф сатомшкакс Саранскяень эряйхнень транспортть якаманц мархта сотф ограничениятнень мархта содафтомасна. Тянь мяльс сявозь республикань Оцюнясь макссь поручения саранскяй мэрияти ламонь-крда виияфтомс мероприятиятнень ошеряйхнень матчнень пингста ошть эряфса эвондай полафткснень мархта содафтомаснон коряс. «Аш кода нолдамс, штоба футболонь праздниксь, конанди площадкакс арай Саранскяйсь, араль прябалакс тежятть эряйти! Сембось лац-ряц арьсема, нолнемок тевс тяфтама уровенень мероприятиянь етафтомаса лия ошнень опытснон», - китькстазе Владимир Волков.

Саранск ошень округонь оцюнясь пачфтезе, што тестовай колмоце матчть карша тевс нолдафт уликс сембе информационнай площадкатне и ресурсне сянкса, штоба эсь пингстонза содафтомс ломаттнень эвондай полафткснень мархта. «Транспортть якаманц полафтоманц колга памяткатне явондовихть школатнень и идень саттнень вельде, синь повфневихть объявлениянь доскатнень лангса, кармайхть кучсевома смс-оповещеният, арьсекшневи явомс памяткатнень квартиратнень эзга», - мярьгсь Петр Тултаев.

Мордовия Республикань Оцюнять пресс-службац