Мордовиянь Оцюнясь Владимир Волков 25 майста телефононь пачк поздравляндазе юбилей мархта С.В.Катковонь лемса республиканскяй клиническяй больницянь сестрать-хозяйкать Вера Кокоревать, конанди тячи топодсь 60 киза.
Мордовиянь Оцюнять эзда апак учентт гайфтемась сатозе Вера Дмитриевнань кудса, тяниень пингть сон больничнайса. Рабочай вастса авась урмаясь коронавируснай инфекцияса, пчксесь стационарса, тяни урмась пцтай потась. «Саворне пчксян, надиян курок мрдан работама», - мярьгсь республикань Оцюнясь.
Владимир Волков арьсесь именницати пчкамс сяда куроконяста и кеме шумбраши лама кизос.
Вера Кокорева шачсь Ельниковскяй районца, С.В.Катковонь лемса республиканскяй клиническяй больницяса сон работай 25 киза. Лама кизот совестьс коре работаманкса сон казьф больницянь администрациять благодарностьса, Мордовия Республикань Здравоохранениянь министерствать Почетнай грамотасонза. Республикань Оцюнять эзда Вера Дмитриевнанди казненди максфт панчфонь пусма и микроволновай печь.
«Спасибамань валхне мзярдовок аф улендихть лишнайкс минь медиконьконди и сембонди, кие работай больницятнень эса, тюри коронавируснай инфекциять каршес, - китькстазе Владимир Волков. – Синь работайхть эсь шумбрашиснон инкса аф пелезь – тя пяк питни, сяс нинге весть – оцю спасиба трудонтень инкса республикань сембе эряйхнень лемста!»
Мордовия Республикань Оцюнять пресс-службац