16 январьста Республикань Кудть Колоннай залсонза ульсь торжественнай мероприятия, кона лемтьфоль российскяй печатень шити. Республикань журналисттнень поздравляндазень Мордовиянь Оцюнясь Владимир Волков. Региононь вятись отмечазе обществать эряфса массовай информациянь средстватнень оцю вастснон, китькстазе, што журналисттнень профессиональнай работасна лезни властти курокста лихнемс лангс и решандакшнемс оржа прябалатнень, путни путкс республикать сяда товолдонь вииякшнеманцты.
Мордовиянь Оцюнясь тись итокт 2016 кизоти. Инголи аськолкст тифт экономикань сембе отраслятнень эса, тяка лувксса промышленностьса, велень хозяйстваса, строительстваса. Кассть основной капиталти инвестициятне, республикать лангс коль сяда оцю мяль шарфнихть омба мастронь инвесторхне. Мялень касфни сатфкс сатсть Мордовиянь аграрийхне – производствать касомац отрасляса пачкодсь 112 процентс. Перерабатывающай промышленностень предприятиятне производствань объмтнень коряс васенцеда арасть фкя лацоннекс оцю промышленность мархта. Строительнай отрасляса работатнень объемсна кассь 15 процентта и аськолдась 27 миллиардть вельхкска. Тя ламода сатовсь вете процент алу льготнай ипотекать тевс сувафтоманц вельде. Программась няфтезе эсь эффективностенц, тевс сонь нолдазь ни 2 тежятть ломанць, тянь мархта республикань строительнай отрасляти дополнительна сувафтфоль 4 миллиардт цалковай. Республикань Оцюнясь Владимир Волков азозе сянь, што сон примась решения поладомс тя программать 2017 кизоть аделавомс.
Фкя инь васенце задачакс власти 2016 кизоня, кода китькстазе Владимир Волков, арась касфтомс зароботнай платать инфляциять коряс. И тя сатфоль – зарплатась кассь 7 процентта, а инфляциясь пачкодсь 5,5 процентс. 2017 кизоня, Владимир Волковонь валонзон коряс, путневи задача касфтомс зарплататнень средняйста 8 процентта, а инфляциясь учендомас коре кармай 4,5 процентть видеса.
Аськолкст инголи тифт и социальнай сфераса. Колмоце кизось мельцек республикаса отмечсеви населениять миграционнай касомац – 2016 кизоня сон пачкодсь 3 тежятть ломаньц. 2017 кизоня арьсекшневи строямс несколька социальнай ширде эрявикс объект, тяка лувксса од школат, поликлиникат. Тиеви тя аф най Саранскяйса, но и республикань райоттнень эса.
Регионть вииякшнеманцты ламода лезни 2018 кизонь футболть коряс чемпионатти анокламась. Цебярь полафткст эвондайхть эряфонь сембе ширетнень эса. Кепотьксонди, строяви лама од ки кода ошса, стане и велеса. Республикань Оцюнясь азозе, што рамаф ни 50 од автобус мундиальть пингста ошень маршруттнень эса работаманкса. 2017 кизоть васенце кварталста Саранскяи должен поступамс 30 од троллейбус.
Цебярь шири сембе ня полафткснень няфнесазь СМИ-тне. Владимир Волков азсь журналисттненди благодарностень валхт совестьс коре работанкса и тевти ответственностень марязь малаткшнеманкса, арьсесь сяда товолдонь творческяй сатфкст.
Тя шиня тифтольхть итокт республиканскяй журналистскяй конкурсненди. Мордовиянь Оцюнясь казезень сяськихнень казнеса.
Мордовия Республикань Оцюнять Пресс-службац