16 январьста Республикань Кудть Колоннай залсонза етась торжественнай мероприятия, кона лемтьфоль Российскяй печатень шити. Республиканскяй журналисттнень поздравляндазень Мордовиянь Оцюнясь Владимир Волков. Региононь вятись отмечазе массовай информациянь средстватнень обществать эряфса оцю значенияснон, китькстазе, журналисттнень профессиональнай работасна лезни власттненди курокста сотцемс и решандакшнемс оржа прябалатнень, путнесы эсь путксонц республикать сяда товолдонь виияфнеманцты.
Ладяф койс коре Мордовиянь Оцюнясь тись итогт 2017 кизоти. Ламоц показательхнень коряс Мордовиясь аделазе тя кизоть сяда лац тяда ингольденнеть коряс.
Сатфкст сатфт экономикань сембе отраслятнень эса, тяконь лувксса промышленностьса, велень хозяйстваса, строительстваса, Промышленнай производствань индекссь арась 111 процент – тя фкя инь цебярь результатсь странаса. Меля панчф 12 од производства, ушетф нинге кота заводонь стрямась.
Кассть основной капиталти инвестициятнень лувкссна. Оцю сатфксокс арась Рузаевкаса инголяй социально-экономическяй касондомань-вииякшнемань территориять панжемац.
Мялень кепси сатфкст сатсть Мордовиянь аграрийхне: кочкаф рекорднай урожай – 1 миллион 450 тежянь тонна сера.
Лац работасть строительхне. Меля Мордовияса строяфоль 330 тежянь квадратнай метра эряма васта. Максф 5 тежятть ипотечнай кредит, конатнень марстонь лувкссна 7,5 миллиард цалковай. Тя пцтай 1,5-крда сяда лама тяда
ингольдень кизоть коряс. Ня кредиттнень пцтай колмоцекс пялькссна 5 процент алу льготнай ипотечнай кредитт.
«Тейнек тя важна экономикать ширенц кирнеманкса. Кафта кизоста (тняра пинге работай льготнай ипотекань программась) республикань строительнай отрасляти инвестировандаф пцтай 7 миллиартт цалковай», - отмечазе Мордовиянь Оцюнясь.
Строительнай отрасляса тифть оцюшка пяльксоц сотф футболть коряс миронь чемпионатти анокламатнень мархта. Лама тиф Саранскяйть и Рузаевкать благоустройстваснон коряс. Железнодорожниконь ошсь кармай петневома-мазопневома сяда товга.
2017 кизоня властти фкя инь васенце задачакс, кода азозе республикань Оцюнясь, ульсь инфляциять коряс сяда пяк заработнай платать касфтомац. И тянь удалась тиемс. Тяка пингть среднемесячнай зарплатась Мордовияса кизоть итогонзон коряс ульсь 25 тежянь цалковай.
Кда корхтамс бюджетть состояниянц и республикать государственнай шумонц колга – тяса ситуациясь, кемафтозень журналисттнень Владимир Волков, кирдеви контроль ала. Республикась етафтсь эряфс важнай проектт промышленностьса, велень хозяйстваса, оцю строительнай программат Мокшэрзянь народть российскяй государствань нароттнень мархта ладязь эрямастост 1000 кизонь илати, футболть коряс миронь чемпионатти. Тяда башка, Мордовиясь примси участия сембе федеральнай программатнень эса и обеспечендакшнесы синь софинансированияснон, штоба республикась касондоль-вииякшнель сяда тов.
Сембе ня тематне мушендыхть васта республиканскяй СМИ-тнень эса. Журналистскяй конкурсонь сяськихненди Владимир Волков макссь казнет. Тяка пингть региононь вятись отмечазень «Человек труда» и «Во имя процветания» номинацияса «Известия Мордовии» достойнай газетать
материалонзон и «Столица С» еженидельниконь журналисткать Ирина Затылковать работанзон.
Шнафоль «Народное телевидение Мордовии» телекомпаниясь, кона кизода кржа пингста пачфтезе эсь вещаниянц пингонц 8 часттненди молемс.
Отмечафоль «Старт-ФМ» радиоть работац.
«ИнтоНАЦИЯ» номинацияса, кона лемтьф межнациональнай отношениятнень кемокснемаснонды, башка отмечафтольхть «Вайгель» радиостанциясь, «Мокшень правда» газетась и «Восход» большеигнатовскяй газетась.
Стане жа Мордовиянь Оцюнясь отмечазе кода примеронь «Рузаевскяй газетать» работанц. Сон васенцекс республикаса арась лама форматоннекс. Тяса журналисттне фкя пингста аноклакшнихть материалхт газетав, интернет-порталу и Мордовияса фкя и тяка районнай телевиденияти.
«Вестник Мордовии» информационнай агенствать респуубликань Оцюнясь отмечазе кода федеральнай источникнень мархта интернетса фкя инь сидеста цитировандави СМИ-нь. Владимир Волков шназе сонь редакторонц Виталий Моисеевонь оперативнай работанц.
Фкя инь васенцекс прессать работаса, кода китькстазе меколи республикань Оцюнясь, должен лядондомс объективностсь. Материалхнень анокламста качественнай работать эзда ащи СМИ-тнень лангс ломаттнень ширде надиямась.
«Лиякс можна юмафтомс ломаттнень мялень шарфнемаснон и самс сянди, што киоскста аф рамасак тястоконь прессать. Тяфта ни лиссь ламоц региоттнень эса, тяконь лувксса шабраньконь ширеса. Инь цебярсь, кда тоса мишендевихть федеральнай изданиятнень региональнай приложениясна. Мордовиять медиарынканц вииксшиц – минь марстонь сатфксоньке, кона эряви ванфтомс» - мярьгсь Владимир Волков.
Мордовия Республикань Оцюнять пресс-службац