17 февральста Мордовиянь Оцюнясь Владимир Волков примась участия судейскяй сообществать итоговай совещаниясонза, конань пингста тифтольхть итокт 2016 кизонь работати, ванфтольхть сяда товолдонди платтне.
«Тячи судебнай системать фалу кирдьсы сельме инголе Российскяй Федерациянь Президентсь, - азозе В.Д.Волков. – Азфт задачатне, конат путневихть судейскяй корпусть инголе. Тяфта, ладяма работась законодательствать лац-ряц сьмекаманц коряс. Аф решандаф кизефкста, кода и любой системаса, аф кржа. Но мекольце 3-4 кизоста примаф мератне лездсть ламода цебярьгофтомс судебнай системать».
Кода отмечазе республикань Оцюнясь, касонды населениять доверияц судебнай властти. Несколька киза ни приметневи судебнай араламанкса обращениятнень лувксснон касондомац. Региононь эряйхне няйсазь, кода полафтсть лангс ванозь суттнень зданиясна. Судопроизводствать качестванц цебярьгофнеманкса тевс сувафневихть электроннай технологиятне, тяконь лувксса «Правосудие» автоматизированнай системась, тифт судебнай сайтт.
«Кизоста кизос касонды судебнай заседаниятнень лувкссна, конат етафневихть видеоконференцсвязть коряс. Оцю работа тиф сянкса, штоба судебнай тевсь улель сядонга панжадокс обществати (Интернетса судебнай решениятнень, судьятнень колга сведениятнень макссемасна), - азозе Владимир Волков. – Мялезе отмечамс властень исполнительнай оргаттнень, законодательхнень, правоохранительнай блокть и судть еткса межведомственнай сотксть».
Кода отмечазе республикань Оцюнясь, марстонь работась васендакиге водендаф Мордовия Республикань мировой судьятнень работаснон обеспечендаманцты. Именна синь лангозост прашендыхть инь оцю сталмотне.
«Эсь ширденк минь сяда товга поладсаськ республикать территорияса мировой юстициять работанкса условиянь тиендемать, мировой судьятнень материально-техническяй обеспеченияснон», - поладозе В.Д.Волков.
2016 кизоня примаф закон, кона кафта единицада касфнесы Мордовияса мировой судьянь должносттнень и судебнай участкатнень лувксснон. Тяни эздост нильгемонь нилие. Тянь вельде ламода теждялгофтови мировой судьятнень работасна.
«Сякокс мировой судьятненди сашендови тиендемс работань оцю объемт. Тейнек марса эрявихть анокламс рекомендацият, конат лездыхть петемс тефнень, - отмечазе республикань Оцюнясь. – Тяфта, электроннай документооборотти етамась лезды кирьфтамс судса тефнень ваномаснон пингонц».
Мяль шарфтфоль присяжнай заседателень институтть реформированиянцты, 2018 кизонь 1 июньцта сявомок районнай суттнень эса уголовнай тефнень ваномаса кармайхть участвондама присяжнай заседательхне.
«Конешна, минь шарьхкотькшнесаськ, што тя вяти финансовай карьхцненди, сави васьфтемс сталмот присяжнайхнень кочкамаснон мархта. Сембось эряви лацкас арьсемс и примамс виде решения, - мярьгсь Владимир Волков. – Россиянь Президентсь Владимир Владимирович Путин путни инголенк марстонь задачат, конат сотф судейскяй корпусть и марнек правоохранительнай системать мархта».
Пуромксса азфоль, што башка мяль эряви шарфнемс граждаттнень трудовой праваснон араламаснонды, тяконь лувксса трудть инкса пандомать мархта сотф кизефксне, населениять социальнай ширде аф аралаф категориянзон праваснон ваномасна, а стане жа персемс кить контрафактнай продукцияти, аф качественнай и ломанть эряфонцты пельксонь канни товархненди и услугатненди, тяконь лувкссот алкогольнай продукциясь и лекарственнай средстватне.
«Лама прябалада пуромсь жилищно-коммунальнай хозяйстваса. Эрявихть лихнемс лангс коммунальнай услугатнень лангс питнень латцемста, граждаттнень аварийнай эряма вастста етафтомста, капитальнай ремонтонь фондонь средстватнень карьхцямста закононь колсематнень, - отмечазе Владимир Волков.- Эряви макссемс казяма правовой оценка должностной лицатнень, управляющай компаниятнень и обслуживающай организациятнень стак ащемаснонды. Минь содасаськ, што синь тевти ответственностьфтома малаткшнемасна, аф добросовестнайста обязанностьснон пяшкотькшнемасна аф шуроста вятни зиянц».
Башка мяль Владимир Волков шарфтсь ЖКХ-са, потребительскяй рынкаса, строительстваса, топливно-энергетическяй комплексса, земельнай отношениянь сфераса и лесопромышленнай отрасляса, кедитно-финансовай и банковскяй секторса экономическяй преступлениятнень лангс лихнемаснон коряс работать виияфнеманцты.
«Эрявикс кизефкссь – бизнесть безопаснай работанц обеспечендаманкса условиянь тиендемась, собственностень сембе форматнень эффективнай араламасна, предпринимательхнень аф законнай преследованияда араламасна, - отмечазе МР-нь Оцюнясь. – 2017 кизось Россияса азф Экологиянь кизокс. Тя кошарясамазь минь башка внимательнайста ваномс перьфпяльть ванфтоманц коряс законть мяльс сявондеманцты. Инь оржа прябалатне тяса сотфт модань и ведень объекттнень рдазыяфнемаснон, вирень ресурснень салсемаснон и вирьса пожарнай безопасностень правилатнень колсемаснон мархта. Тя ширетнень эса работась сядонга виияфнема, штоба сатомс цебярь сатфкст».
Стане жа марстонь работати фкя инь эрявикс ширекс азфоль терроризмать и экстремизмать каршес тюремась.
«Президентсь В.В.Путин башка китькснесы судебнай системать кадровай обеспечениянц, правосудиять панжадоста улеманц коряс темать. Эряви ванфнемс судейскяй корпусть « арушинц» и касфнемс судти ломаттнень надиямаснон. Оперативнай действиятнень эса тинь участиянтень эзда ащи справедливостти, законть инголе сембонь фкя лацоннекс улемаснонды ломаттнень надиямасна. Уважаемай ялгат! Мялезе азомс благодарностень валхт каждайть лемс профессиональнай работантень инкса. Арьсян теенть сатфкст и сембе цебярть», - мярьгсь Владимир Волков.
Справка:
Мордовиянь суттнень мархта, тяконь лувксса сембе уровенень федеральнай судьятнень и мировой судьятнень мархта 2016 кизоня ванфоль 5029 уголовнай тев. Районнай суттнень мархта ванфоль 2024 уголовнай тев, мезсь 0,5 процентта сяда кржа 2015 кизонь показательхнень коряс. 1676 тевть коряс азфоль приговорсь. 1,4 процентта кассь аф пяк стака тефнень лувкссна. Кирсь стака преступлениятнень колга тефнень лувкссна. 2016 кизоняя эздост ванфоль 624. Средняй сталмонь тефнень лувкссна кирсь 1,5 процентта.
2016 кизоня аделаф тефнень оцюшка пялькссна сотфоль корыстнай преступлениятнень мархта, а стане жа преступлениятнень, конат сотфт наркотическяй средстватнень аф законц коре оборотснон мархта.
2016 кизоня районнай суттнень мархта ванфоль 15091 представления, ходотайства и жалоба, мезсь 6,4 процентта сяда лама 2015 кизонь показательхнень коряс.
Сембе уголовнай тефне и материалхне ванфт суттнень мархта азф пингть апак колсек.
2016 кизоня районнай суттнень мархта ванф23749 гражданскяй и административнай тев. 2015 кизоть коряс тефнень марстонь лувкссна кирсь 9,5 процентта.
Спорсематнень коряс тефнень пялькссна, конат эвондакшнесть семейнай правоотношениятнень эзда, пачкодсь 4,1 процентс. Тефнень ламошкасна – тядятнень-алятнень родитетелень праваснон сявомаснон колга – 158, иттнень воспитандамаснон мархта сотф спорсематне – 90 тев.
Трудовой спорсематнень коряс тефнень пялькссна пачкодсь 3 процентс или 434 тевс.
Модать лангс собственностень правть мархта сотф тефне – 2267 тев.
Жилищнай правоотношениятнень мархта сотф тефнень пялькссна пачкодсь 11,2 процентс, пенсионнай законодательстваста – 584 тев или 3,8 процент.