Мордовиянь Оцюнясь Владимир Волков 15 майста Саратовса примась участия Российскяй Федерациянь Безопасностень советть Секретаренц Николай Патрушевонь и Приволжскяй федеральнай округса Россиянь Президентть полномочнай представителенц Михаил Бабичень марстонь выездной совещаниясост. Корхтамась мольфтевсь округонь региоттнень территорияса наркотическяй веществатнень аф законц коре оборотснонды, а стане жа тонафни од ломаттнень кальдяв промозс водендакшнемаснонды кить персеманц колга.
Совещанияса выступандамста, ПФО-са РФ-нь Президентть полномочнай представителец мярьгсь: «Аф совершеннолетняйхнень еткса правонарушениятнень профилактиканкса, криминальнай структуратненди од ломаттнень таргсемаснонды кить персеманкса ПФО-нь региоттнень эса етафтф оцю работа. Округса пуроптф и коль виияфневи тянь коряс региональнай нормативнай правовой база, мольфтеви работа экстремизмать и терроризмать инголяманкса, тянди водендакшневихть общественнай организациятне», -азозе Михаил Бабич.
Фкя инь таколфты прябалакс тячиень шити полпредсь азозе Интернетть вельде од ломаттнень противоправнай тефненди водендакшнемаснон. Телевизорса няйфсь сидеста полафнесы од ломаттнень прянь вятемаснон. Кепотьксонди, СМИ-тнень эса Пермскяй крайса, Новосибирскяй и Курганскяй областтнень эса, Бурятия и Башкортостан республикатнень эса трагическяй событиятнень колга пачфтемда меле, подросткатнень коль сяда оцю мяльсна эвондакшни срхкафнемс противоправнай акцият школаса.
Россиянь Безопасностень советть Секретарец Николай Патрушев шарфтсь мяль сянди, што эряви виияфнемс гражданско-патриотическяй и духовно-нравственнай воспитаниять.
«Коль касонды экстремистскяй преступлениятнень лувкссна, конатнень ламошкасна тифт од ломаттнень мархта, тяконь лувксса аф совершеннолетняйхнень кядьса. Туфталкс тянди арсихть кальдяв качествань образованиясь, трудоустройствать мархта сотф прябалатне, социальнай аф фкя лацонь шись, а стане жа омба масторонь государствань спецслужбатнень и организациятнень работасна, кона водендаф нравственнай устойхнень и
патриотическяй традициятнень колсеманкса», - китькстазе Николай Патрушев.
Тяка пингть сон отмечазе, што вяре азфти кить персеманкса тиендеви аф кржа. Тяфта, 2025 кизоти молемс Российскяй Федерациянь од ломанень государственнай политикать эряфс етафнеманц рамкаса округса эряфс етафневи 40 лама региональнай программа, етафневихть комплекснай оперативно-профилактическяй мероприятият, коза водендакшневи 120 лама общественнай организация, панчсевихть военно-патриотическяй воспитаниять коряс центрат.
Михаил Бабич азсь мяль виияфнемс од ломанень политикать. Россиянь Президентть полномочнай представителец шарфтсь мяль госпрограммать примаманцты, кона виияфтсы уполномоченнай оргаттнень работаснон.
Стане жа совещанияса корхтафоль наркоманиянь прябалать колга. Полпредть валонзон коряс, округонь региоттнень эса эряфс етафневи лама социальнай, медицинскяй, правовой и административнай мероприятият наркоманияти кинь персеманкса. Тя прябалать лангс шарфневи башка мяль властень оргаттнень, правоохранительнай и контролирующай ведомстватнень ширде.
Примаф мератне лездсть кирьфтамс округса наркотиконь примсихнень лувксснон (7,5 процентта), тяконь лувксса аф совершеннолетняйхнень еткса. Тянь мархта ряцок, правоохранительнай оргаттнень мархта 2017 кизоня лангс лихтьфоль 36 тежяньда лама преступления, конат сотфт наркотикнень аф законц коре оборотснон мархта (касомась 3,5 процент).
Россиянь Президентть полномочнай представителец Михаил Бабич азондсь федеральнай законодательстваса уликс прябалатнень колга и шарфтозе совещаниянь участникнень мяльснон синь решандамаснонды.
Совещаниять пингста кулхцонтфтольхть федеральнай министерствань и ведомствань представительхнень, округонь региоттнень оцюняснон, Россиянь Безопасностень советонь члеттнень выступлениясна.
Заседанияса азф инь цебярь мяльхне-арьсематне сувафтовсть решениянь проектти и пачфтьфт Российскяй Федерациянь Президентти.
Мордовия Республикань Оцюнять пресс-службац