Мордовиянь Оцюнясь Владимир Волков 3 майста примась участия «Россия – 2018» АНО-ть наблюдательнай советонц заседанияса. Заседаниять видеоконференциянь режимса етафтозе Россиянь Президентсь Владимир Путин. Корхтамась мольфтевсь футболть коряс миронь чемпионатти стадиоттнень и инфраструктурань лия объекттнень анокшиснон колга.
Государствань Оцюнясь китькстазе, што анокламатне пцтай аделафт, Россиясь турнирти анок.
«Минь обязанностеньке, кода инжиень примай, внимательнай азоронь, заботендамс эрь болельщикть колга, конат сайхть первенствань матчненди. Волонтерхне, услугань сферань представительхне, конат работайхть чемпионатонь объекттнень эса, должетт улемс анокт лезнемс инжихненди сембе кизефксснон эса, - отмечазе Президентсь.
Стане жа Государствань Оцюнясь китькстазе, што аноклаф инфраструктурась – тяниень пингонь аэропорттне, вокзалхне, китне, развязкатне, цифровой технологиянь сфераса наработкатне и управлениянь интеллектуальнай систематне – лезды российскяй региоттнень, ошнень виияфнемаса и ломаттнень эряфснон цебярьгофнемаса.
Видеоконференциянь режимса прямой включеният ульсть Самараста, Калининградста и Нижняй Новгородста.
Заседанияса примась участия ФИФА-нь оцюнясь Джанни Инфантино, кона отмечазе Россиять футболть коряс миронь чемпионатти анококс улеманц и азсь надияма , што странаньке етафтсы сонь инь оцю уровеньца.
Видеоконференциять аделавомста республикань Оцюнясь Владимир Волков етафтсь «Мордовия Арена» стадионца рабочай совещания, коса корхтафоль турнирть, а стане жа лядыкс тестовай матчнень, конат кармайхть 4 и 16 майста, етафтомаснонды анокламать колга.