8 февральста Саранскяйса панжевсь «Кванториум» идень технопарксь – дополнительнай образованиять научно-техническяй напрвлениянь од площадкац. Мордовиянь Оцюнясь ванозе технопаркть , штоба максомс оценка сонь возможностензонды и азомс напутствиянь валхт од исследовательхненди.
Лятфтасаськ, меля Мордовиясь сувась странань 17 региоттнень лувксс, конатненди максфтольхть средстват идень технопарконь панжеманкса. 56 миллион цалковайсь федеральнай бюджетста и 24 миллион цалковайсь республиканскяй казнаста макссть возможность рамамс эсь лацонь оборудования и тиемс шабатненди афкуксонь лабораторият несколька направленияс коре исследованиянь вятеманкса. Тя лазернай технологиятне, биотехнологиясь, альтернативнай энергетикась, роботостроениясь и, конешна, компьютернай технологиятне – коза тячи синьфтомост? Оборудованиясь тяниень пингонь инь одсь, конань лангс ули кода каямс сельме кой-кона промышленнай предприятиятнендивок. Важна: специализациятне технопаркса кочкафт ся направлениятнень мяльс сявозь, конат арсихть республикати инь главнайкс. Идень технопарксь работай «Технопарк-Мордовия» АУ-ть видеса.
Мордовиянь Оцюнясь ванозень сембе лабораториятнень, или, кода синь тяса лемнесазь, квантумтнень. Кепотьксонди, «Энерджи» квантумса тонафневи альтернативнай энергетикась, механикась, электротехникась.
Сембоц технопаркса сисем тяфтама лабораторият. Фкясь эздост – эсь лацонне: тя «Лазерные технологии» квантумсь. Тяфта специализация аш странань фкявок идень технопаркса. Саранскяйса тя специализациясь панчфоль сяс, мес республикаса виияфневи волоконнай оптикась и оптоэлектроникась. И оптическяй волокнать производстванц коряс странаса фкя и тяка заводсь работай Мордовияса, Саранскяйса. Сяс Россиянь Минобразованиясь кирдезе республикать ширенц оптикать и лазернай технологиятнень коряс специализациять идень технопаркса пажеманц коряс.
«Тяфтама оборудования лангса ули кода тиендемс афкуксонь открытият, - отмечазе республикань Оцюнясь Владимир Волков. – Минь идень технопарконьке правас коре ули кода лувомс инь козякс странаса. Зданиять строяманцты тейнек карьхцямс ашезь сава, минь панжеськ тя площадкать «оцю» технопаркть видеса. И сяс сембе средстватне, конат нолдафтольхть тя проектть рамкаса, минь карьхцяськ тяниень пингонь инь од оборудованиять рамаманкса».
Республикань Оцюнясь поздравляндазень школьникнень, конат тяни кармайхть занцема пря научно-техническяй творчестваса тяфтама цебярь условияса.
«Идень технопаркть панжеманц мархта дополнительнай образованиянь системась етась качественнай од уровеньц, - китькстазе Владимир Волков. – Содамошитне, конат получавихть тяфтама технопаркса, лездыхть шабатненди анокламс сай пингонь профессияснонды, сатомс сатфкст эряфса».
Мордовиянь Оцюнясь отмечазе, што сяда тов республикань райоттнень эса панжевихть идень технопаркть филиалонза, а сонь специализациянзон лувкссна ламода касфтови. Стане жа Владимир Волков тердезень промышленнай предприятиянь вятихнень кирдемс сотрудничествань соткст идень технопаркть мархта, приметнемс тяста од кадрат эсь производстваснонды.
Технопаркть панжемста республикань Оцюнясь казезень школьникнень еткса научно-техническяй творчествань республиканскяй конкурсонь сяськихнень, кошардозень синь венемомс од сатфксненди, штоба виияфнемс отечественнай наукать.
Мордовия Республикань Оцюнять Пресс-службац