Мордовиянь Оцюнясь Владимир Волков 18 мартста примась участия «Союз промышленников и предпринимателей Республики Мордовия» работань макссиень региональнай объединениять собраниясонза.
Тячиень шити Союзть региональнай объединениязонза, конань вятьсы «Талина» компаниянь группать президентоц Виктор Бирюков, сувси пцтай 200 участник – тя оцю промышленнай предприятиятне, ведущай банкне, строительнай и научнай организациятне, агропромышленнай секторонь предприятиятне, а стане жа емла и средняй бизнесонь представительхне.
Собранияса корхтафоль властть и бизнесть марстонь работаснон колга, кона лезды виияфнемс республикань экономикать.
Владимир Волков азозень ся задачатнень, конат решандамат инголенди. Фкясь эздост – экспортнай продукциять касфнемац. Международнай рынкав лисемась – республикань предприятиятнень виияфнеманкса фкя инь васенце условиясь. Кода азозе республикань Оцюнясь, международнай уровеньц лисеманкса тейнек эряви нолнемс тяниень пингонь продукция, конанди вийс коре кирдемс конкуренциять мировой рынкаса.
Эряви азомс, што Мордовиянь промышленникнень и предпринимательхнень Союзснон региональнай объединениянц работанц рамкаса пуроптф ни внешнеэкономическяй работать коряс комиссия, конань вятьсы республикань Торгово-промышленнай палатать руководителец Константин Пакшин.
Лия эрявикс задачатнень еткста азфтольхть предприятиятнень эса трудть производительностенц касфнемац, передовой технологиятнень тевс сувафнемасна, а стане жа высококвалифицированнай кадратнень анокламасна. Владимир Волков лятфтазе, што республикаса асу од ломаттнень мархта работаманкса аноклаф целай система. Тяфта, ефси аф кунара Мордовияса панчфоль идень Технопарксь. Владимир Волков тердезень республикань предприятиятнень вятиснон кирнемс соткст идень дополнительнай образованиянь тя од площадкать мархта, «касфнемс» тяса сай пингонь кадрат эсь производстваснонды.
Стане жа республикань Оцюнясь отмечазе внутриреспубликанскяй производственнай кооперациять виияфнеманц эрявиксшинц. Владимир Волков ужяльдезь азозе – мзярс тя работась республикасон вятеви аф фалу. Прябалать решандаманкса азфоль мяль оцю завоттнень видеса панжемс емла предприятият. Экономикань и Промышленностень, наукань и од технологиянь министерстватненди максфоль поручения сяда лац ваномс тя кизефксть.
Кода азфоль собранияса, путф задачатнень ули кода пяшкодемс государствать и бизнесть марстонь вийснон вельде. Мордовиянь Оцюнясь китькстазе, што республикаса бизнести максови сембе эрявикс лезкссь. Тяка пингть предприятиянь вятихненди аш кода юкснемс социальнай ответственностть колга, нльне тяниень пингонь аф теждя финансово-экономическяй условиятнень пингстовок мушендомс возможность заработнай платать касфнеманкса. Тядде, лятфтазе Владимир Волков, сон должен касомс 10 процентта.
Собраниянь участникне пачфтсть Мордовиянь Оцюняти эсь прябаласнон колга. Тяфта, сельхозпроизводительхне пеняцясть, што емла предприятиятненди аф фалу сатомшкать льготнай кредиттне. Владимир Волков надияфтсь максомс теест лезкс республиканскяй бюджетста.
Мордовия Республикань Оцюнять Пресс-службац