Мордовиянь Оцюнясь Владимир Волков 18 майста ётафтсь тага фкя выездной совещания Миронь чемпионатти анокламань объекттнень эса. Тяконь лувксса, республикань Оцюнясь ванозе перехватывающай парковкатнень строямаснон, кона тяниень пингть шумордама лангса.
Лятфтасаськ, болельщикненди, конат сайхть Саранскяи мировой футбольнай первенствань матчнень ванома, панжевихть кафта перехватывающай парковкат—Лямбирскяй шоссеса (Саранскяи ардомста ащи кержи ширеса) и Восточнай обходса Макаровка веленять маласа. Лямбирскяй шоссеса парковкась арьсеф 2223 легковай автомобиленди, 41 автобусонди и инвалидонди 65 вастонди. Макаровка веленять маласта перехватывающай парковкаса тиф 2314 васта легковой автомобиленди, 48 васта—автобусонди, 90 васта—инвалиттненди. Парковкатнень эзда инжихне кармайхть пачфневома ошу специальнай автобусса.
Кода азфоль, транспортнай средствань собственникненди, конат кадсазь машинаснон парковкатненди, аф сави таколткшнемс автомобильснон ванфтомаснон инкса. Парковкатнень эса ладяви видеонаблюдения, мельгаст кармай ванома охранась.
Маластонь пингть, кода азозе Владимир Волков, арьсекшневи шумордамс видеонаблюдениянь системать монтаженц.
Выездной совещанияса марса республикань Оцюнять мархта примасть участия Мордовиянь Правительствать Председателец Владимир Сушков и Саранск ошень округонь оцюнясь Петр Тултаев.
Мордовия Республикань Оцюнять пресс-службац