Мордовиянь Оцюнясь Владимир Волков 14 февральста корхтась национальнай культурать виияфнеманц колга – сон васетькшнесь «Ассоциация финно-угорских народов Российской Федерации» Общероссийскяй общественнай движениять председателенц, Саранск ошень округонь оцюнять Петр Тултаевонь, а стане жа Мордовскяй (мокшень и эрзянь) народть Межрегиональнай общественнай организациянц вятиензон Юрий Мишанинонь и Александр Лузгинонь мархта. Тяниень шити республикаса тя инь оцю общественнай организациясь, конань представительстванза улихть Россиянь 40 регионца.
Васедемань участникне спасибасть республикань вятити национальнай культурать ширенц кирнеманкса, тяконь лувксса Мордовия Республикань Оцюнять 2017 кизонь 25 сентябрть эзда Указонц мархта азф «Шумбрат» республиканскяй национально-фольклорнай илать инкса. Кода ульсь отмечаф, арьсекшневи етафтомс сонь кизонда.
Республикань Оцюнясь Владимир Волков китькстазе: нароттнень культурасна пяшкотькшни обществаса маласькофни тефт, лезни ломаттненди маладомс и сяда лац шарьхкотькшнемс фкя-фкянь. «Республиканьконди аф фкя лацонь народнай творчествась, койхне-обуцятне, ремеслатне – аф аньцек оцю козяши, тя минь эсь лацоньшиньке. Задачаньке – тиемс «Шумбрат» фестивальть мялень салайкс, няфтемс козя национальнай культураньконь», - мярьгсь Владимир Волков.
Васедемаса башка корхтафоль Мордовиять лангс туристтнень мяльснон шарфнеманц колга. Корхтамась мольфтевсь республикань райоттнень эса
национально-культурнай центратнень, туристическяй инфраструктурати сувафнемаснон колга.
Стане жа ванфтольхть народнай промыслатнень и ремеслатнень виияфнемаснон мархта сотф кизефксне. Васедемань участникне азозь, што 17 февральста Теньгушеваса «Мордовия мастеровая» республиканскяй этнокультурнай проектть рамкаса етафтови промыслань, ремеслань и народнай творчествань фестиваль, конань эса примайхть участия мастерхт аф аньцек республикаста, но и лия региоттнень эздовок.
Фестивальсь надияфни арамс афкуксонь праздникокс национальнай культурань кельгихненди. Аф фкя лацонь семейнай мастерскойхнень презентацияда башка, етафтови круглай шра, конань участниконза кармайхть корхтама традиционнай промыслатнень и ремеслатнень велетнень ванфнемаснонды оцю путксснон колга.
Республикань Оцюнясь Владимир Волков согласиндась мяльть мархта етафнемс фестивальть фалу.
Васедемаса стане жа ульсь Мордовия Республикань Оцюнять Администрациянц вятиец Андрей Богатов и сонь заместителец – внутренняй политикать коряс Управлениять начальникоц Александр Ратников.
Мордовия Республикань Оцюнять пресс-службац