Ноябрьста Россиянь Президентсь Владимир Путин эсь указонц мархта кемокстазень традиционнай духовно-нравственнай питнишитнень ванфнемаснон и кемокснемаснон коряс государственнай политикать юронзон. Тя сядонга пяк важна специальнай военнай операциять ётафтомста.
«Минь марса кочксетяма гуманитарнай лезкс, ладяме военнослужащайхненди и синь семьяснонды лездомань система. Минь содасаськ, што ули пелькс противникть террористическяй и экстремистскяй организациянзон, мархтонк аф ялгафни странатнень ширде. Сядонга сидеста тя тиендеви информационнай пространстваса. Именно тяфтама совещательнай оргаттнень и советтнень рамкаса священнослужительхненди, учёнайхненди, педагокненди, культурань, од ломанень организациятнень покодиснонды ули кода азомс эсь мяльснон-арьсемаснон, штоба марса шарьхкодемс кода эреклафнемс сире пингонь духовно-нравственнай питнишитнень, васендакиге касы поколениять ёткса», - мярьгсь Артём Здунов.
Сон шарфтсь мяль стака подросткатнень мархта работати, сятнень, кие аф примси участия олимпиаднай движениятнень, грантовай работать эса. Тя категориясь получси лама информацияда интернет-источникнень эса, улихть сонцень аф формальнай авторитетонза. Тянь колга мольфтевсь корхтамась Госсоветть пингста, конань ётафтозе государствань оцюнясь.
Документть эса, конань кемокстазе странань Президентсь, китьксневи традиционнай питнишитнень кемокстамаса православиять вастоц. Азфоль, што тя работась республикаса ладяф аф кальдявста — Саранскяйсь ащи Приволжьянь православнай од ломанень центракс: пуропневи «Пересвет» православнай форум, эрь кодама проектт эряфс ётафни Православнай од ломанень союзсь, работай «Владычный полк» историческяй клуб.
Саранскяй и Мордовскяй митрополитсь Зиновий азондсь Мордовскяй митрополиять республикань государственнай, общественнай и образовательнай организациятнень мархта марстонь тевонь вятеманц колга.
Мордовиянь Правительствать Председателенц заместителец Галина Лотванова пачфтезе, што тяниень пингть школьникнень тядяснон-аляснон 70 процентсна кочксесазь тонафнеманди «Основы православной культуры» модульть. 2021 кизоня Мордовиянь кота пилотнай школатне работайхть авторскяй программатнень коряс. Именна эсост тонафнихнень, конат тиендихть правонарушеният, лувкссна ламода кирсь. 2022 кизоня тяфтама школада и идень сатта арась арась 20. Галина Алекссевна китькстазе «Разговор о важном» урокнень эрявиксшиснон. Азф мяль виияфтомс тяфтама работать СПО-нь учреждениятнень эсовок, водендакшнемс стирьхнень-цёратнень волонтёрскяй тевти.
Башка мяль шарфтфоль прябалатнень лангс, тяконь лувксса демографияти. Азфоль, што одс шачихнень ёмла лувкссна няфнесы кода вииякшни обществась. Именна тяфтама пропаганда тяниень пингть тяряфнихть ётафтомс Россиять мархта аф ялгафнихне: тиемс кальдявкс минь традиционнай семейнай питнишиньконь, штоба обществась «кулсель».
Традиционнай православнай духовно-нравственнай питнишитнень ванфнемаснон и содафокс тиендемаснон и патриотическяй воспитаниять коряс инь цебярь практикатнень колга азондсть Мордовиянь культурнай и образовательнай учреждениятнень руководительсна.
И.Д.Воронинонь лемса Мордовскяй республиканскяй объединеннай краеведческяй музейть директоронц научнай работать коряс заместителец Дмитрий Фролов отмечазень музеень историческяй и национальнай экспозициятненди вешфксть.
Школьникнень мархта патриотическяй работать эсь лацонь ширензон колга азондсь Советскяй Союзонь Геройть А.И.Семиковонь лемса Темниковскяй школань директорсь Галина Пиксина. Тя школась — авторскяй программатнень коряс работаса пилотнайхнень ёткста фкясь. Тонафнемань учреждениять эса ули ушаковецонь движения, работай медиа-студия. Стирнятне-цёранятне активнайста участвондасть «Гардемарины-2022» Нахимовскяй военно-морской училищань, кадетскяй корпусонь и классонь Всероссийскяй театральнай фестивальть эса.
«Од ломаттнень духовно-нравственнай воспитаниясна — тя аф фкя шинь работа. Тя эрь шинь оцю работа», - китькстазе Галина Пиксина.
Башка мяль шарфтфоль директорхнень воспитательнай работать коряс заместительснон анокламаснонды. Азфоль, што Мордовияса тонафнемань специальнай программать ётазь 74 священнослужительсь, конат тяни кармайхть лезнема школань сотрудниконь тя категорияти подросткатнень духовно-нравственнай и патриотическяй воспитаниясост. Тя работати полады Евсевьевонь лемса МГПУ-сь, кона арась директорхнень заместительснон одукс тонафнемаснон коряс пилотнай вузкс.пилотнай вузкс. Башка мяль тонафнемать эса шарфтови историческяй грамотностть лангс.
Мордовия Республикань Оцюнять пресс-службац