Пяденцяста, 19 майста, Мордовиянь Оцюнять нюрьхкяня пингс тевонзон тиендисна Владимир Волков етафтсь васедема ОНФ-ть активистонзон мархта. Васедемать пингста корхтафоль 2015-2016 кизонкса республикаса «НАРОДНЫЙ ФРОНТ «ЗА РОССИЮ» Общероссийскяй общественнай движениять Региональнай отделениянц общественнай предложениянзон эряфс етафнемаснон итогснон, а стане жа 2017 кизоня приоритетнай проекттнень пяшкотькшнемаснон колга.
Фкя инь эрявикс проектсь – «Дорожная инспекция ОНФ/ Карта убитых дорог». ОНФ-ть РО-ц Региональнай исполкомонц сопредседателенц Олег Каштановонь валонзон коряс, республикати максф цебярь оценка китнень качестваснон коряс.
«Проектсь водендаф региоттнень эса дорожнай политикать пуроптомаса граждаттнень участвондаманкса и китнень качестваснон цебярьгофтоманкса. Главнай задачатне – китнень ремонтсна граждаттнень азфснон мяльс сявондезь, ся ешмотнень машфнемасна, конатнень эзда ащи аварийностсь. Проектть ули кода лемдемс эсь пингоннекс, сяс мес ломаттнень аф фалу тушенды мялезост китнень качествасна, синь лангсост оцю аварийностсь, - азозе проектть координатороц Игорь Еремкин.
Владимир Волковонь валонзон коряс, регионть руководствац стане жа лувондсы эрявиксокс Саранскяйса, а стане жа райоттнень эса китнень нюрьхкяня пингста петнемаснон, сявондемок мяльс ломаттнень азфснон (кочкайхнень наказснон).
«Саранскяень китненди ремонтонь тиеманкса и синь кирдеманксост нолдаф 800 миллион цалковай, коза сувафтф ки лангонь службатненди од поколениянь специальнай техникать рамамац», - азозе Мордовиянь Оцюнять нюрьхкяня пингс тевонзон тиендисна.
Карьхцень башка статьякс арси республикать столицаса 2018 кизонь Миронь чемпионатти китнень строямасна.
«Генеральная уборка/Карта свалок» проектть координатороц Иван Сидорин отмечазе, што ОНФ-ть проектоц максси возможность ломаттненди, конат анокт участвондамс «карьхчу объекттнень» аруяфтомасост, путомс эсь путксснон экологическяй обстановкать цебярьгофтоманцты, арамок волонтеркс. Целайнек проектсь водендаф регионть санитарнай состояниянц лангс граждаттнень мяльснон шарфнеманкса. Проектть рамкаса тевс нолдафоль «Интерактивная карта свалок» сетевой ресурссь, конань лангса граждаттненди ули кода эстеест отмечамс аф законнай свалкать.
«ОНФ-нь активисттнень, озадонь седихть аф ащекшни эряйхнень вийснон мархта урядафоль 4 аф санкционированнай свалкат. Важна, што аруяфнематнень эса примсесть участия од ломаттне. Надиятама, што тяфтама акциятне лездыхть аф аньцек цебярьгофтомс экологическяй обстановкать, но и кошардомс ломаттнень арушить ванфнема», - поладозе Иван Сидорин.
ОНФ-нь активисттне арьсекшнихть аруяфтомс нинге колма свалкат райоттнень эса.
Мордовиянь Оцюнять нюрьхкяня пингс тевонзон тиендиснон валонзон коряс, республикаса важна аф аньцек машфтомс аф санкционированнай свалкатнень, но и тиемс уликс норматненди отвечайкс пуроптф полиготтнень. Тя прябалать ули кода решандамс, кда сембе республикать кармай обслуживандамонза фкя оператор. Стане жа Саранскяйса арьсекшневи строямс мусоросортировочнай завод.
Владимир Волков кирдезе ОНФ-нь активисттнень мяльснон пуроптомс субботник сембе республикать келес Россиянь шить карша, кона отмечсеви 12 июньцта.
Ошнень благоустрайстваснон мониторингонц коряс Центрась, кона пуроптфоль Россиянь Президентть, Общероссийскяй народнай фронть лидеронц Владимир Путинонь поручениянц коряс, водендаф ошнень и куд перьфнень благоустройстваснон пингста граждаттнень азфснон мяльс сявондеманкса. Центрась работай «Формирование комфортной городской среды» правительственнай проектть рамкаса.
Центрать работац водендаф ошеряйхненди эсь куд пирьфснон инфраструктуранц полафтоманц коряс решениятнень примамаса лезксонь максоманкса, а стане жа благоустройствань тефнень пяшкотькшнемасост ломаттнень кошаряманксост.
МР-нь Оцюнять нюрьхкяня пингс тевонзон тиендисна китькстазе, што республикаса куд пирьфнень благоустройстваснон коряс работась мольфтевсь нинге ОНФ-ть проектонц эвондамдонза инголе и мольфтевсь кочкайхнень наказснон пяшкотькшнемаснон рамкаса. Корхтамок тя кизефксть коряс, сон отмечазе, што петнемс-тиендемс эрявихть аф най куд пирьфне, но и паркне, скверхне.
«Народная оценка качества» проектсь водендаф социальнай сферань организациятнень работаснон качестваснон цебярьгофнеманкса. Ушедсь 2017 кизонь мартста.
narocenka.ru сайтса озадонь седихть аф ащекши ломанць может азомс эсь мялензон-арьсеманзон поликлиникать, идень садть и социальнай сферань лия организациятнень работаснон колга.
Владимир Волков, корхтамок медицинскяй учреждениятнень работаснон колга, отмечазе отраслять этапонь этап реформированиянц эрявиксшинц.
«Равные возможности – детям» проектсь пуроптф 2017 кизонь мартста. Водендаф сянкса, штоба эрь шабать улель возможностец питнефтома мяльс коре кружокс или секцияс.
«Мордовияса шабатнень 70 процентсна заняфт дополнительнай секцияса и кружокса, тя странаса фкя инь цебярь результатсь, - азозе проектть координатороц Юрий Базов. – Регионца улихть техническяй ширень кружокт. Работай «Кванториум» идень технопарксь. Улихть условият ограниченнай возможность мархта шабатнень мархта занятиянь етафнеманкса».
«Профстажировки» проектсь арьсеф инженерно-техническяй образовательнай учреждениянь выпускникнень специальностьс коре стажировкать кочкамаса ширеснон кирнеманкса, мезсь лезды предприятиятненди сявомс работама од специалистт Россиянь разнай региоттнень эзда. ОНФ-нь эксперттне китькстазь, што тячи промышленностень ламоц отраслятнень эса аф сатнихть инженерно-техническяй и рабочай кадратне.
«Республиканьке индустриально-аграрнай, коса работайхть высокотехнологичнай промышленнай предприятият. Инновационнай продукциять пяльксонц коряс минь странаса васенцетнень етксотама. Сяс предприятиятненди эряви водендакшнемс оцю квалификациянь од специалистт, тяконь лувксса и лия региоттнень эзда», - Мярьгсь МР-нь Оцюнять нюрьхкяня пингс тевонзон тиендисна.
Васедемать итогонзон коряс Владимир Волков макссь поручения кочкамс ответственнай лицат ОНФ-нь активисттнень мархта марстонь работань вятеманкса.