Шавшиста, 18 апрельста, Мордовиянь Оцюнять тевонзон тиендисна Владимир Волков примась участия торжественнай собранияса, кона лемтьфоль Республикань светотехниконь шити.
И.М.Яушевонь лемса Государственнай музыкальнай театрав пуромкшнесть рабочайхне, предприятиянь вятихне и специалисттне, инженерхне и мастерхне, ученайхне, преподавательхне, светотехническяй промышленностть пцтай сембе направлениянзон представительсна.
«Тячи эсь лацонь праздник. Отмечсеви сон аньцек минь регионцонк. Лама кемотть кизонь квалмоса светотехникать мархта сотф Мордовиянь тежжятть ломанть эряфсна. Поздравляндатядязь тинь, сембе коллегантень, отраслянь ветераттнень профессиональнай праздниконтень – Мордовия Республикань светотехниконь шить мархта, - мярьгсь МР-нь Оцюнять тевонзон тиендисна.- Мялезе башка китькстамс, што Россиянь Президентть В.В.Путинонь мархта васедемасонк, кона ульсь 12 апрельста, башка мяль шарфтфоль светотехническяй промышленностть сяда товолдонь виияфнеманцты. Мон азыне Президентти, што минь эреклафнесаськ ся отраслятнень, конат виихтельхть миньцонк кунардонь пинкнень. Васендакиге, светотехникать. Тячи странаса эрь колмоце лампочкась нолдаф Саранскяйса. И минь работатама сянь лангса, штоба лисемс эрь омбоцеть лангс. Президентсь кирдезень сембе мяленьконь ширеснон и арьсесь отраслянь трудовой коллектифненди цебярь работа».
Республикаса 5 кизода инголе пуроптфоль светотехническяй отраслянь кластерсь. Тяниень пингти тяза сувафтфт 43 предприятиясь, тяконь лувкссот приборостроительнай и оптоволоконнай предприятиятне. Кластерть виияфнеманкса водендаф 5 миллиартт цалковай. Панчф 2 тежяньда лама од рабочай васта. Инновационнай продукцияда нолдаф 28 миллиартт цалковаень питнеса. Меля кластеронь участникнень инновационнай продукциянь объемсна кассь 23 процентта.
«Башка отмечаса, што 5 кизоста трудть производительностец отрасляса кассь кафтонь-крда! Мелянь кизоть коряс 1 миллион 200 тежянь цалковай фкя ломанть лангс. Мзярда 2012 кизоня пуропнеськ светотехническяй кластерть, тя показательсь кода аф кода пачфневсь 450 тежянь цалковайс фкя ломанть лангс», - поладозе Владимир Волков.
«Технопарк Мордовии» АУ-ть видеса работай Энергосберегающай светотехникань центрась, кона козякофтф тяниень пингонь оборудованияса. Тядде арьсекшневи сувафтомс стройс волоконнай оптикань Инжиниринговай центрать. Республикась латци сотрудничествань соткст фотоникать виияфнеманц коряс ведущай научнай центратнень мархта.
Мелянь октябрь ковста «Светотехника и оптоэлектронное приборостроение» инновационнай кластерсь сувась Россиянь Минэкономразвитиять конкурсонц эса сяськихнень лувксс.
«Кластеронь участникнень инголе ащи задача занямс отечественнай светотехническяй рынкать нилеце пяльксонц, а стане жа касфтомс продукциять экспортонц, - отмечазе Владимир Волков. – Миньцонк тянкса улихть сембе условиятне. Мордовияса промышленнай производствать марстонь объемсонза инновациятнень пялькссна пачкотькшни 28 процентс. А светотехническяй предприятиятнень эсса тя показательсь – 50 процент. Тячи предприятиясонк нолневи тяниень пингонь светотехническяй продукциять пцтай сембе ассортиментоц. Тя светонь энергоэффективнай источникне и синь основасот световой приборхне, электроннай компанентнай базась и освещениять мархта управлениять системац. Тяфта, кепотьксонди, «Лисмась» ладязе светодиоднай филаментнай лампать нолнеманц, кона занцесыне од рынкатнень».
Мекольдень кизотнень региононь руководствась путсь лама вийда тя эсь лацонь предприятиять эреклафтоманкса. Заводть удалась араламс срадомада-калодомада, ломаттненди панневи аф кальдяв зарплата. Тячи «Лисмась» - Россияса и СНГ-са светонь источниконь инь оцю производительсь.
Предприятиять продуктовай линейкасонза 600 лама продукция. 15 процентсна прважсеви экспортс. Латцевихть сотрудничествань соткст Чехиянь, Венгриянь, Иранонь, СНГ-нь странань предприятиятнень мархта. Меля «Лисмась» панчсь марстонь предприятия Бурундиса.
«Минь целеньке – занямс африканскяй рынкать, лисемс транснациональнай уровеньц. Минь кематама, што од компаниять оцюфт перспективанза», - мярьгсь В.Д.Волков.
Оцю аськолкст отраслять виияфнеманкса тифт «Кадошкинскяй электротехническяй заводса» и «Ардатовскяй светотехническяй заводса». Ня предприятиятне арсихть градообразующайкс, занцихть оцю васта эсь районцнон виияфнемасост.
Ардатовскяй заводса нолневи светильникон кафта тежяньда лама модификация. Тяни мольфтеви предприятиять техническяй перевооруженияц, латцеви осветительнай приборхнень массовай производствасна.
Кадошкинскяй заводсь арси газоразряднай светильник мархта лампань ведущай производителькс. Предприятияса инновационнай продукциять пяльксоц пачкотькшни 40 процентс. Производствань объемтнень касомасна 27 процент.
«Традиционнай осветительнай приборда башка миньцонк виияфневи светонь специальнай источниконь производствась. Мон азыне Президентти, што марса «Непес» южнокорейскяй фирмать мархта минь нолнесаськ республикаса эсь светодиодоньконь. Тяниень пингть предприятияса келепневи удаленнай люминофоронь технологиять коряс светодиоднай светильниконь ассортиментсь. Футболть коряс миронь чемпионатти анокламатнень рамкаса мархтост кармайхть валдопневома Саранскяень, Нижняй Новгородонь и Волгоградонь стадиоттне», - азозе республикань Оцюнять тевонзон тиендисна.
Лодыгинонь лемса светонь источниконь научно-исследовательскяй институтсь нолни лама ультрофиолетовай лампа, конат сувафневихть тевс медицинаса, косметологияса, велень хозяйстваса.
«Мялезе башка отмечамс, што Мордовияса пуроптф цебярь база светотехникаса профессиональнай кадрань анокламанкса. Университетсонк ули светотехническяй факультет. 2015 кизоня сон лемтьфоль Электроникань и светотехникань институткс. Тяни сонь видесонза етафневи аф кржа перспективнай исследования. Проекттнень эзда фкять од ученайхне етафнесазь эряфс Испанияста профессорть Фернандо Бризонь руководстванц ала, - отмечазе Владимир Волков. – Сай пингонь ученайхнень и инженерхнень анокламасост башка васта занци Асу шабанди лицейсь. Аф кунара Саранскяйса панчфоль идень технопарксь. Сон козякофтф техникаса, конатнень лангса иттненди ули кода етафнемс афкуксонь исследованият. Башка киткстаса, штоба касондомс-вииякшнемс, эряви шарфнемс мяль инновациятненди, эреклафнемс отраслять научнай потенциалонц, сувафнемс производствати научнай разработкатнень. Водендакшнемс тя тевти од ломаттнень, паннемс теест достойнай зарплата, решандакшнемс синь жилищнай прябаласнон. Тянкса республикаса тячи ули сембе эрявикссь».
В.Д.Волковонь валонзон коряс, именна светотехникне тиезь республикать содафокс кода «ши валдонь» региононь, а Саранскяйть – светонь отечественнай столицань.
Отраслянь инь цебярь работникненди казьфтольхть казнет.
Благодарностень башка валхт азфтольхть светотехникань ветераттнень лемс. Владимир Волков казсь теест лятфнембяленди казнет.
Стане жа отраслянь работникнень профессиональнай праздникснон мархта поздравляндазень МР-нь Государственнай Собраниять Председателец В.В.Чибиркин.
Республикань творческяй коллектифне кеняртьфтезь пуромфнень мялень салай концертса.