Мордовиянь Оцюнять тевонзон тиендиснон Владимир Волковонь лемс сась серма Санкт-Петербургонь губернаторть Георгий Полтавченконь эзда.
Сермать эса корхтави:
«Уважаемай Владимир Дмитриевич!
Санкт-Петербургонь Правительствать и сембе петербуржецнень лемста азан тееть седи ваксстонь благодарностень валхт зияноконь эзда шири аф лядондоманкса, ширень кирдемань лямбе валонкса.
Ине куень преступлениясь сязезе мезьсовок аф мувору ламоц ломаттнень эряфснон. Метроса сязевомать пингста шавовсть и ранендафтольхть петербуржецт, Россиянь лия региононь, омба масторонь эряйхть, разнай национальностень, верань, конфессиянь ломатть. Терроризмась аф содай перяфкст. Сон киньге аф ужяли. Тя минь марстонь сярятьфоньке.
Тейнек питни Санкт-Петербургонь ломаттнень мархта фкя мяльс кирдеманте. Ширень кирдемась тяфтама пингста пяк эрявикс, сон максси вийхть эрямс, сяда тов касондомс-вииякшнемс.
Кеман, што аньцек фкя-фкянь мархта марса улеманьке лезды тюремс тя кяжть мархта и сяськомс сонь.
Санкт-Петербургонь губернаторсь Г.С.Полтавченко».
Лятфтасаськ, што 3 апрельста Санкт-Петербургонь метроса сязевомать пингста ранендафоль Мордовиянь эряйсь Дмитрий Глазков.
МР-нь Оцюнять тевонзон тиендисна Владимир Волков азсь од ломанть и сонь семьянц лемс ужяльдемань валхт и примась решения максомс Дмитриенди материальнай лезкс.