20 сентябрьста Мордовия Республикань Правительствать Председателенц тевонзон тиендисна Владимир Сушков, республикань Оцюнять Владимир Волковонь поручениянц коряс, етафтсь совещания, коса корхтамась мольфтевсь 2018 кизонь футболть коряс миронь чемпионатть пингста безопасностень кизефкснень колга.
Совещанияса участвондасть республикань исполнительнай властень органонь, Саранск ошень Администрациянь, силовой структурань, «FIFA-2018» футболть коряс миронь чемпионатонь оргкомитетонь вятихне, а стане жа Российскяй Федерациянь национальнай гвардиянь Сибирскяй округонь офицеронь группась, конань вятезе округонь командующайть заместителец, генерал-майорсь Игорь Водопьянов.
Башка мяль совещанияса шарфтфоль Саранскяйса футболть коряс миронь чемпионатонь матчнень етафтомста общественнай безопасностти.
Сембе кизефкснень коряс примафт марстонь решеният. Кемокстаф договоренность республикать и Росгвардиять еткса сотрудничендамать коряс.
Владимир Сушков и Игорь Водопьянов азсть кемама сянди, што марстонь работась кармай эффективнай и лезды достойнайста васьфтемс и етафтомс миронь чемпионатонь матчнень.
Мордовия Республикань Правительствать пресс-службац