Мордовиянь Оцюнять тевонзон тиендисна В.Д.Волков отвечась СМИ-нь представительхнень кизефксснон лангс

Шуваланяста, 13 апрельста, Мордовиянь Оцюнять тевонзон тиендисна В.Д.Волков етафтсь пресс-конференция, кона лемтьфоль шида тяда инголе Москуса Россиянь Президентть мархта васедеманцты.

МР-нь Оцюнять тевонзон тиендисна азозе журналисттненди, кодама кизефксне кепсевсть Президентть мархта корхнемста, а стане жа республикань Оцюнять тевонзон тиендикс азоманц колга.

«Васедемстонк мон пачфтень Владимир Владимировиченди Мордовиять касомань-вииякшнемань основной показателензон колга, сянь, мезе сатфоль мекольдень вете кизоста, а стане жа эряфс етафневи проекттнень квалма», - азозе Владимир Волков.

2016 кизоть республикась аделазе экономикань сембе отраслятнень эса касомаса. 7 процентта кассь промышленнай производствась, касфтовсть основной капиталти инвестициятне, строяф лама эряма васта, кит. Сембода главнайсь – касфневи заработнай платась, башка велеса. 2018 кизоня арьсекшневи касфтомс зарплатать 10 процентта.

«Владимир Путин отмечазень велень хозяйстваса сатфксоньконь ОНФ-ть медиафорумсонза, кона ульсь Санкт-Петербургса. Афкукс, мекольдень кизотнень касомась тя отрасляса пачкодсь 7 процентс. Касфневи сиволень производствась, кочкаф серонь, сахарнай якстеряпсонь оцю урожай».

Республикаса эряфс етафневи 20 лама проект промышленнай производствать виияфнеманц коряс. Регионць арси лидеркс инновационнай продукциять нолнеманц коряс – 28 процент.

«Тядде Мордовияса тевс сувафтовихть колма од предприятият: кабелень производствать коряс заводсь, коса кабельнай кластерсь касфтови 35 киловольтста сявомок 100 киловольтти молемс; медицинскяй препаратонь заводсь, кона кармай работама импортонь полафнемать лангс; светонь од источниконь производствать коряс заводсь.Кажнайсь тя завоттнень эзда кармай нолнема колма миллиартт цалковай питнес продукция. Тейнек важна мишендемс нолневи продукциять аф аньцек российскяй рынкаса, но и пачфнемс лия странав», - поладозе МР-нь Оцюнять тевонзон тиендисна.

Поладови оптоволокнать производстванц коряс производствась, конань эзда 2017 кизоня арьсекшневи нолдамс кафта миллиотт вайгяльбеда лама, а стане жа заводть омбоце очереденц работас нолдамац. Тядде арьсекшневи шумордамс инжиниринговай центрать строямац.

«Шумордамок тя проектть, ули кода панжемс Россияса од отрасля - тя оптоэлектроннай приборостроениясь, минь тянди аноктама ни и ведущай предприятияньконь и ученаеньконь мархта заняфтама странаса фотоникать виияфнеманц мархта. Тя работать ушедоськ кафта кизода инголе, - поладозе Владимир Волков. – Саранскяйсь ульсь «светонь столицакс». Тяни минь эреклафтоськ светотехникань предприятиятнень, эздост несколька, кучкастоннесь – «Лисмась». Россияса эрь колмоце лампочкась - Саранскяенне. Тяни работатама сянь лангса, штоба эрь омбоце лампочкась странаса улель Саранскяень. Но тя аф ся продукциясь, кона ульсь тяда инголе. Тя светодиотт, тя галогеннай лампат, простой лампат, штоба улель тонатфокс ломаттненди ашкоткшнемс сонь патронти. А потмосост вольфрамть вастс кота ватт мощностьса светодиотт. Минь тиеме модернизация марнек отраслять эса, активнайста работатама экспортть лангс. Пачфнесаськ продукцияньконь Ирану, Чехияв, Венгрияв, Германияв. Бурундиса панжеме марстонь предприятия».

Президентть майскяй Указонзон пяшкотькшнемаснон рамкаса тифтольхть од работама вастт, строяф 227 квадратнай метра эряма васта, 7,5 тежянь ломанць цебярьгофтозь эрямань условияснон. Сяда тов полатф 5 процент алу ипотечнай кредитованиянь программась. Тя программать вельде удалась касфтомс строительнай производствань объемть, 2000 лама семьясь рамасть эряма вастт.

Регионть руководствац оцю мяль шарфни од ломанень политикати. Мордовияса пуроптф идень технопарк. Шабатнень ули возможностьсна варжамс инженеронь тевть: тиемс робот, тонадомс квадрокоптерть вятемонза, содамс мезе стамсь ГМО-сь, тиемс мощнай лазер, тонадомс 3D моделированияти, содамс кода заряжамс телефонть водородть вельде, арьсемс мобильнай телефононди программа, решандамс стама задачат, кодамот тяда инголе кивок ашезь решандакшне. Сонь филиалонза кармайхть сембе райоттнень эса.

«Тейнек важна кеподемс республикаса образованиять уровененц. Асу шабанди Республиканскяй лицейсь, кона занцесы омбоце вастть Россиянь инь цебярь школатнень рейтингсост, должен арамс кинь няфтикс, - азозе Владимир Волков. – Минь фалу путнесаськ эсь инголенк инь оцю задачатнень, конатнень, мярьгат, аф вийс коре пяшкодемс, но именна тя лезни тейнек касомс-вииякшнемс. Минь старандатама тиемс сембе условиятнень, штоба цебярьгофтомс ломаттнень эряфснон».

Корхтамок инголенди путневи задачатнень колга, Владимир Дмитриевич башка лоткась 2018 кизонь футболть коряс миронь чемпионатонь объекттнень строямаснон лангс, тяконь лувксса «Юбилейный» микрорайонца и «Тавла» жилой комплексса. Израилень предприятиять мархта арьсекшневи етафтомс эряфс Мордовияса велень хозяйствань сфераса проект.

Республикань руковдствась путни оцю задачат райоттнень эса од производствань панчсемать коряс. Рузаевскяй районца арьсекшневи панжемс мебельнай завод, Большеигнатоваса – теплица.

Стане жа оцю работа кармай вятевома избирательхнень наказснон пяшкотькшнемаснон коряс. Тя кинь, школань, культурань кудонь строямась и петемась. Арьсекшневи строямс школат Рузаевкаса, Торбеевскяй райононь Дракина велеса, Зубово-Полянскяй райононь Умет поселкаса.

«Молемок кочкаматненди, кеман, што мон и командазе тисаськ семботь, мезсь ащи эздонк, штоба республикась касоль-вииякшнель, цебярьготкшнель ломаттнень эряфсна», - азозе меколи В.Д.Волков.