Мордовиять и Беларусть ёткса кунара ни ладяфт ялгань соткст, марстонь тевонь вятемась мольфтеви Мордовия Республикань Правительствать и Беларусь Республикань Правительствать ёткса торгово-экономическяй, научно-техническяй и культурнай сотрудничендамать колга соглашениять мяльса кирдезь. Примаф 2025 кизоть самс марстонь мероприятиянь дорожнай картась.
Мекольдень пингть сотрудничендамась лисенди од уровеньц, панчсевихть сотрудничендаманди од кит-ятт.
«Тяни Мордовиянь 60 предприятиясь работайхть Беларусь Республикань предприятиятнень мархта, - азозе Артём Здунов. - Внешнеторговай оборотсь тядде арась 138 процент, и касомс тейнек тянь ширде ули коза».
Белорусь Республикав эсь продукцияснон пачфнесазь «Рузхиммаш», «Сарансккабель», «Сарансккабель-Оптика», «ЭМ-Кабель», «ЭМ-Кат», «ЭМ-Пласт» предприятиятне, «Саранский приборостроительный завод» ПАО-сь, «Резинотехника» саранскяй заводсь, «Оптиковолоконные системы» АО-сь, «Лидер-Компаунд» АО-сь, «Биохимиксь», «Ксенонць».
«Минь ваноськ ни, мезьса содаф Мордовиясь. Тя, тяконь лувксса оптоволокнось, тинь заводонте — СНГ-са фкя и тякось. Корхтафтоськ, кода касфтомс белорусскяй рынкаса сонь улеманц», - мярьгсь Дмитрий Крутой.
Мордовиясь и Беларуссь латцихть соткст велень хозяйствань, культурань, образованиянь и здравоохранениянь сфератнень эса, мольфтеви марстонь работа туризмать виияфнеманц коряс.
Мордовиянь Оцюнясь тердезень Беларуссияста инжихнень «Россия» Международнай выставкас-форумс — лятфтасаськ, сон ётафтови странань Президентть Владимир Путинонь поручениянц коряс ВДНХ-ть территорияса. 30 ноябрьста кармай Мордовиять шиц — экспозициясь няфтьсы регионть этнокультурнай лама ширенц, а стане жа наукаса, промышленностьса, социальнай сфераса сатфксонзон.
Республикань Кудса васедемаса примасть участия Нижняй Новгородса РФ-са Беларусь Республикань Посольствать советникоц Владимир Воронкович, Нижняй Новгород ошса Россиянь МИД-ть представителец Сергей Малов, Нижняй Новгород ошса Россиянь МИД-ть Представительстванц Саранск ошса Отделениянц руководителец Светлана Старцева, республикань министронь кабинетонь члеттне.
Мордовия Республикань Оцюнять пресс-службац