Мордовиясь азф васенцекс межнациональнай соткснень коряс всероссийскяй рейтингса. Исследованиять коряс, конань етафтозе охранань Федеральнай службась мелянь итокнень коряс, республикань эряйхнень 93,2 процентсна лац корхтайхть регионца межнациональнай климатть и межнациональнай соткснень колга.
«Тячи Мордовияса фкя-фкянь мархта ладязь эряйхть 100-да лама национальностень представительхне. Сембе синь лувондсазь республикать родной кудкс. Сяс, авторитетнай эксперттнень ширде цебярь оценкась кепси мяль.
Россиянь Президентсь В.В.Путин нинге 2012 кизоня путозе республиканьконь примеронди межнациональнай соткснень латцемаса. Государствань лидерсь китькстазе, што Мордовиясь – лама национальностень республикань инь цебярь пимерсь, коса пяк лац ладяфт сотксне аф фкя лацонь этноснень и религиятнень еткса.
Тяда башка, Мордовиянь Оцюнять Указонц мяльс сявозь эрь кизоня етафневихть фольклорно-этнографическяй илат: «Акша келу», «Раскень озкс», «День славянской письменности и культуры», «Сабантуй», и лиятне», - азозе МР-нь Общественнай палатань членць, МР-нь народнай поэтсь Камиль Тангалычев.
Республикась путни лама вий, штоба ванфнемс и виияфнемс территориясонза эряй сембе нароттнень культураснон. Тяса работай несколька оцю культурнай организация. Кепотьксонди, «Россиянь народонь Ассамблеять» отделенияц, Россиянь финно-угорскяй народонь Ассоциациясь, Финно-угорскяй народонь культурань Поволжскяй центрась, «Якташлар» татархнень национально-культурнай автономиясна, Всероссийскяй азербайджанскяй конгрессть отделенияц, Россиянь армяттнень Союзсна, еврейхнень Саранскяй национально-культурнай автономиясна, Саранскяень украинецнень национально-культурнай автономиясна, ошень казачай обществась, русскяй культурань центрась и ламотне лиятне.
Сембе ня объединениятне лезнихть кемокснемс ладямать Мордовияса эряй нароттнень еткса.