Мордовиясь няфтсь инь оцю социально-политическяй кемоши

Мордовиясь сувась региоттнень еткс, конат няфнихть инь оцю социално-политическяй кемоши. Тянь квалма пачфни «Петербургская политика» фондсь 2016 кизонь декабрьста РФ-нь субъекттнень традиционнай рейтингсост.

Фондонь эксперттнень оцю оценкасна ламода ащесь Россиянь Правительствать решениянц эзда максомс республикати дополнительнай средстват социально-экономическяй вииякшнемань инь цебярь показательхнень инкса.

Шарфтфоль мяль властень институттнень инновационнай развитияса эффективнай работаснонды. Васендакиге тя республикань Оцюнять Владимир Волковонь и «Технопарк-Мордовия» АУ-ть генеральнай директоронц Виктор Якубань технопаркть кода инь эрявикс инновационнай структурань сяда товолдонь виияфнеманц колга корхтамасна. Лятфтасаськ, што региональнай технопарксь занязе 7 вастть федеральнай рейтингса, конань аноклазе кластеронь и технопарконь Ассоциациясь.

Мелянь декабрьста кемокстафоль соглашения Саранскяйса «Антибиотики» фармацевтическяй научно-производственнай и инжиниринговай центрать панжеманц колга. Владимир Волковонь валонзон коряс, центрась кармай решандакшнемост импортонь полафнемань, омба масторонь лекарствань производительхнень эзда аф ащекшнемань кизефкснень.

Нинге фкя няевикс событиякс арась «АШАН» компаниянь «Наша радуга» гипермаркетть панжемац. Республикань Оцюнясь китькстазе, што потребительскяй рынкаса содаф лем мархта оцю налхкить эвондамац – тя фалу аськолкс инголи экономикаса, бизнесть виияфнемаса и рабочай од вастонь панжемаса.

Мяленц коряс, мокшэрзянь продукциять козяшиц и качествац достойнай мумс васта «АШАН» брендонь магазиттнень полкаснон лангса. Тяда башка, кой-кона продукциять коряс – алхнень, саразонь сивольть, лофцонь ярхцамбяльхнень, кондитерскяй изделиятнень – мокшэрзянь производительхненди вийс коре пяшкодемс супермаркеттнень вешфксснон, конат работайхть лия регионца.

Кафкса рейтинговай баллсь (0,2 балда сяда лама 2016 кизонь ноябрть коряс) лездсть Мордовияти занямс васта странань кемонь инь кеме территориятнень еткса. Республикадонк башка тя группати сувасть Татарстанць, Тюменскяй областсь, Ямало-Ненецкяй АО-сь, Ленинградскяй областсь и лиятне. Мекольце вастсот Карелиясь, Иркутскяй областсь и Приморскяй крайсь.