- Минь васенцеда ётафтсаськ выездной заседаниять МР-нь Правительствать площадканц лангса, - отмечазе РСПП-нь шумбрашинь индустриять, физическяй культурать и спортть коряс комиссиять председателец Виктор Черепов. – Тя лиссь Мордовиянь Оцюнять Артём Здуновонь Промышленниконь и предпринимателень Российскяй союзть президентонцты и РФ-нь Торгово-промышленнай платать президентонцты пшкядемдонза меле. Минь примаськ предложениять, сяс мес Мордовиясь содаф фармацевтическяй промышленностть виияфнемаса историческяй традициянзон мархта, а стане жа улихть передовой технологиянза антибиотикнень производстваса. Оцю аськолксса республикань фармацевтическяй промышленностсь моли од сатфксненди; кадратнень тя отрасляти аноклакшнесыне Мордовскяй госуниверситетсь.
Видеосвязть коряс заседаниянь участникнень приветствовандазень Промышленниконь и предпринимателень Российскяй союзть президентоц Александр Шохин.
- Тя васедемась лемтьф странать технологическяй суверенитетонцты кить вешеманцты, отечественнай лекарственнай средстваса здравоохранениять обеспечендаманцты, - мярьгсь Александр Шохин. – Тейнек удалась ладямс фармотраслянь предприятиятнень работаснон санкциятнень пингста. Тяни минь приоритетоньке – стратегически значимай, эсь оригинальнай препараттнень вельде РФ-нь лекарственнай аф зависимостенц и национальнай безопасностенц обеспечендамац.
Видеосвязть коряс выступандась стане жа РФ-нь Торгово-промышленнай палатать президентоц Сергей Катырин.
- Тячи коллеганьконь кармай возможностьсна ваномс передовой предприятиятнень, - азозе Сергей Катырин. – Мордовиясь содаф эсь фармацевтическяй промышленностенц мархта, сонь предприятиянза работайхть инь оцю уровеньца.
Мордовиянь Оцюнять лемста участникнень приветствовандазень Мордовия Республикань Правительствать Председателец Дмитрий Поздняков.
- Фармацевтикась фалу ульсь и кармай улема республиканьконь промышленностьса ведущай отраслякс, - китькстазе Дмитрий Поздняков. – Миллиотт ломанть эряфснон араламанцты и шумбрашиснон ванфтоманцты оцю путкс тиенди «ПРОМОМЕД» компаниятнень группаснон «Биохимик» компаниясна. «Биохимиксь» аноклакшни и ноляй инновационнай препарат. Тя кизонь март ковста РФ-нь Президентть Владимир Путинонь участиянц пингста Саранскяйса предприятиять видеса панжевсь активнай фармацевтическяй субстанциянь производствать коряс завод. Тячи компаниясь ноляй 300-та лама аф фкя лацонь лекарственнай препарат ( 80 процентсна сувсихть эряфть ванфтоманкса инь эрявикс препараттнень лувксс).
Кода отмечазе Дмитрий Поздняков, республикань Правительствась марса «ПРОМОМЕД» компаниятнень группаснон и Мордовскяй университетть мархта аноклазе Биотехнологиянь виияфнемань федеральнай центрать тиеманц проектонц. Тяса кармайхть вятевома работат, конат тяда инголе тиендевсть омба масторса.
Работань опытснон колга азондсь «ПРОМОМЕД» компаниятнень группаснон директоронь советонц председателец Пётр Белый.
- Мордовияса аноклафтольхть инновационнай препарат, тяконь лувксса противоковиднай препаратсь, - азозе Пётр Белый. – Тянь вельде арафтольхть миллиотт эряфсь. Мордовиянь фармацевтикась обеспечендакшнесы странать инновационнай потенциалонц и сонь лекарственнай безопасностенц!
РФ-нь фармацевтическяй компаниятнень кооперацияснон важнайшинц отмечазе Промышленниконь и предпринимателень Российскяй союзть комиссиянц председателец, «Росмедпром» Ассоциациять президентоц Юрий Калинин.