«Мир возможностей» партийнай проектть координатороц Роман Романов шарфтсь мяль, што Мордовиясь несколька киза ни ащи лидеркс партийнай проектти республикать эзда максф работатнень качестваснон и лувксснон коряс. Корхтамок «Единай Россиять» од инициативанц колга - «Мон — Россиянь гражданинан» акциять азфоль, што тяниень пингть иттнень патриотическяй воспитандамасна лихневи васенце вастти.
Мордовиянь Оцюнясь Артём Здунов азондсь «Тисаськ марса» движениять акциянзон эса республикань од ломаттнень участвовандамаснон и Конституциять питнишинзон колга.
«Мир возможностей» проектсь лезни республикань эрь школьникти няфнемс прянц, арамс социально ответственнай личностькс, кепотьксокс, кона полафнесы цебярь шири эсь сай пингонц и странанц сай пингонц, - мярьгсь сон. - Несколька киза мельцек минь сяськиеньке и призёроньке прважсевихть «Артек» идень международнай центрав, коса синь аф аньцек парста ваймосихть, но тонаткшнихть лама одняс. Сембода важнайсь — шабатне получсихть проектнай, творческяй работань опыт, содафнихть лия региоттнень эзда эсь кизосост иттнень мархта, корхтафнесазь оржа кизефкснень. Колма кизоста республикань 140-да лама лидерсь казьфт «Артек» и «Орлёнок» идень Международнай лагерьхненди путёвкаса».
Региононь Оцюнясь азсь мяль ладямс патриотическяй акциятнень эса участвовандамать коряс марстонь работа Россиянь од региоттнень эзда стирнят нень-цёранятнень мархта: «Аф кунара минь улеме Херсонскяй областень Каланчакскяй районца, тоса активнайста виияфневи «Васенцетнень д вижениясна», важна поладомс тя тевти, пачфтемс минь опытоньконь, содамошиньконь», - мярьгсь Артём Здунов.
Республикань Оцюнясь стане жа шарфтсь мяль сянди, што активнай образовательно-просветительскяй политикась, тяконь лувксса, лезни кирнемс Конституциять авторитетонц од ломанень сообществать эса. Тяка пингть лятфтазе, што Конституциять эса тяштьфт аф аньцек гражданинть праванза и, но и обязанностенза, конституционнай вешфкснень пяшкотькшнеманкса эрьть ответственностец: «Странаньконь виец фалу ульсь народть марса кирдемасонза!»
Шумордавсь мероприятиясь школьникненди, конатненди топодсь 14 киза, паспортонь максомаса. Мордовиянь Оцюнять кядьста эсь главнай документснон получазь 4 ломаттне. Ётксост всероссийскяй аф фкя лацонь акциянь и конкурсонь призёрхт и сяськихть.