Налхкоматнень финалсна ушедовсь «Моя кибер-Мордовия!» шоу-программаста. Эсонза пяк лац сотовсть республиканьконь национальнай колоритоц и тяниень пингонь компьютернай технологиятне. Этно-кибер-модать няфтезе «Варма» арт-театрась.
Турниронь участникнень Мордовиянь Оцюнять Артём Здуновонь лемста приветствовандазень МР-нь Правительствать Председателенц заместителенц тевонзон тиендисна Алексей Ежов: «Компьютернай спортсь минь региононьконди — спортонь од вид, но сон шиста шис арси коль сяда содафокс. Мордовияса тевс сувафтф 2023 кизоть самс компьютернай спортть виияфнеманц коряс региональнай программа. Пуроптфт киберспортть коряс федерацият, клупт и секцият, эрь кизоня ётафневи Мордовиянь чемпионат, республиканскяй и межрегиональнай пялькстомат. Стане жа минь арьсекшнетяма панжемс Мордовияса налхксемань арьсемань-тиемань оцю центра».
Вице-премьерсь арьсесь турниронь участникненди цебярь налхкома и сяськома.
«Пялькстоматнень ётафтоманкса Саранскяйсь кочкафоль кафта туфталонкса. Васенцесь, тяса ули тяниень пингонь эрявикс инфраструктура. Омбоцесь, тейнек максфоль сембе ширдень лезкс республикань руководствать пяльде. Благодарностень валхт — Мордовиянь Оцюняти Артём Алексеевич Здуновонди. Кода няфнесы практикась — региоттнень эса, коса минь ушеткшнетяма ётафнема киберпялькстомат, синь арсихть сембе пингоннекс, - шарфтсь мяль Россиянь Компьютернай спортонь федерациять президентсь Дмитрий Смит. - Киберспортсь сатомшка вии странань сембе региоттнень эса, ня пялькстоматне ётафтовихть международнай форматса. Тяса пуромсть финалисттне и инь вии налхкихне. Киберспортсь лядонды ялгаксшинь средствакс, кона пуропнесыне марс миронь од ломаттнень».
Торжественнай церемонияда меле поладовсть кибер-баталиятне, конатнень коряс и кочкафтольхть инь вии киберспортсметтне.
Турниронь ваныхненди аноклафоль мялень салай программа. Работасть интерактивнай и кштимань зонат, виртуальнай реальностень приставка мархта налхксемань зона и лият.
Мордовия Республикань Оцюнять пресс-службац