Мордовия Республикась азф качествань лидеркс «100 лучших товаров России» программань XX Всероссийскяй конкурсть инь оцю награданзон лувксснон коряс, конатнень сон сявозень.
Фкя пингста продукциянь колма виттне, конатнень аноклакшнесазь Мордовиянь предприятиятне, сувасть Всероссийскяй конкурсть сяда инь цебярь товаронзон еткс. «Вкус качества» призть получазь «Мясо цыплят в собственном соусе» консерватне, конатнень аноклакшнесыне Саранскяй консервнай заводсь. Импортонь полафнемаса сатфксонь сатнеманкса отмечаф «Оптиковолоконные системы» АО-сь, кона нолни E3 емла пик мархта одномодовай оптическяй волокна (G652d). Ичалковскяй сыродельнай комбинатонь «Манчево Ичалки» кеме сырсь азф «2017 кизонь инновациякс». Тяда башка, предприятияти максфоль юбилейнай призсь – «Цебярьс венемоманкса».
Сембоц конкурсть федеральнай этапозонза кучфоль 41 заявка 31 республиканскяй предприятиять эзда. Продукциянь и услугань 14 видсь арасть лауреаткс, нинге 27-сь – дипломанткс, 17-сь получазь «Новинка года» статусть.
«Мекольдень кизотнень республикась сатсь оцю результат инновационнай ширеса вииякшнемать коряс, нолневихть оцю качествань продукциянь од виттне, виияфневи населениять ширде вешеви услугатнень макссемасна. Тянь мархта ряцок, минь лама работатама экспортть касфнеманц коряс. Тяфтама престижнай конкурсса получаф оцю казнетне кемокснесазь мокшэрзянь продукциять качестванц. Минь тисаськ семботь, штоба касфтомс предприятиятнень лувксснон, конатненди вийс коре работамс мировой рынкаса. Тя задачась, конань путнесы марнек странать инголе Российскяй Федерациянь Президентсь В.В.Путин, и тя ся цельсь, конань мяленьке сатомс маластонь кизотнень» - отмечазе МР-нь Оцюнясь Владимир Волков.