Мордовиясь занязе колмоце вастть инь оцю социально-политическяй кемоши мархта региононь группати. Тянь колга пачфневи «Петербургская политика» фондть июнь ковонкса исследованиянц эса.
Организациянь аналитикне азозь етай ковонь несколька няеви событиятнень, конатнень эзда ащесь васттнень явомасна. Шарьхкотьф, инь васенцесь еткстост – Саранскяйса футболть коряс миронь чемпионатонь матчнень лац етафтомасна. Кемотть тежянь инжись макссть оцю оценка етафтоманцты, безопасностти и инжиень примамати. Июнть песта Советскяй площадьста фанзонав сашендсь «юбилейнай» 300-це болельщиксь. Мордовиять столицац арась васенце и фкя и тяка ошкс-организаторкс, коса тя числась пцтай фкя лацонне эряйхнень лувксснон мархта.
Тяда башка, тя спискати сувась Мордовиянь Оцюнять Владимир Волковонь «ЕВРОЦЕМЕНТ груп» холдингть директоронь советонц председателенц Филарет Гальчевонь мархта васедемац. Владимир Волков китькстазе, што фкя инь васенце задачакс цементникненди лядонды нолневи продукциять объемонц касфнемац и предприятиять стабильнай работанц обеспечендамац.
Ашезь ляда мялень шарфтомафтома и «Октябрьская» агрофирмаса мороженайть производстванц коряс линиять панжемац. Владимир Волков китькстазе, што Мордовияти тя символичнай события – регионца 10 кизонь етазь эреклафневи тя танцтинять производствац.
Ули нинге фкя события, конань колга эряви азомс, - Мордовиять 15-це вастоц емла и средняй бизнесть ширень кирнеманкса мератнень информационнай освещенияснон коряс Россиянь экономическяй развитиянь министерствать рейтингсонза.