Телемостонь форматса эсонза стане жа примастьу частия Россиянь Федеральнай медико-биологическяй агентствать руководителец Вероника Скворцова, почётнай донорхне и доброволецне странань эрь-кодама субъектста.
Татьяна Голикова эсь выступлениясонза китькстазе Веронь службать виияфнеманц важнайшинц.
Азфоль, што мекольдень 1,5 кемотть кизоста Веронь службась ламода полафтсь цебярь шири. Одкстоптомась нолдафоль тевс 2008 кизоня Россиянь Президентть инициативанц коряс. Тянь вельде донорхнень талекасна, конат макссихть вер питнефтома, кассь 99 проценттта.
«Спасибан сембе коллеганьконди и донорхненди тя сатфксть инкса! Донорствась — тя важнай и благороднай тев. Сембода главнайсь, што сон лезни аралакшнемс ломанень эряфт», - мярьгсь вице-премьерсь.
Дкостнай пря уень Доноронь Федеральнай регистрать виияфнеманц колга азондсь Вероника Скворцовась.
Сон китькстазе, што мекольдень кизотнень Веронь службась виияфневи. Тяддень 11 ковста аноклаф 2,5 миллион литра вер. Мольфтеви оцю работа плазмать анокламанц коряс.
Сяда тов тифтольхть итокт «#ДавайВступай!» донорскяй движениять ширенц кирдеманкса всероссийскяй марафонти, кона ушетфоль сентябрьста и мольсь 71 ши. Теенза поладсть странань сембе региоттне. Тя пингста ётафтф 600 лама акция, сярьгятьф 323 тёжяньда лама од донор, конатнень эзда 30 тёжянць сувафтфт костнай пря уень федеральнай регисторти, кочкаф 130 тёжяньда лама литра вер. Региоттнень лувксса, конат няфтсть оцю результатт, Мордовиясь. Веронь переливаниянь республиканскяй станцияса донорскяй акциясь ётафтовсь телемостть пингстовок.
Республикань Оцюнясь Артём Здунов китькстазе донорскяй движениять важнайшинц и сянь, што Мордовиясь ащи общероссийскяй повесткаса и пяшкотькшнесыне странань Президентть решениянзон.
«Мон марян оцю гордость земляконень инкса! Аньцек марафонть эса примась участия республикань 8 тёжяньда лама эряйсь, минь пяшкодеськ федеральнай регистрать пцтай тёжянь ломаньда. Мордовиясь койс коре сувси инголе молихнень лувксс донорхнень лувксснон коряс, - китькстазе Артём Здунов. - Президентть поручениянц коряс минь вяттяма активнай работа веронь препараттнень отечественнай производстваснон коряс — тя важнай задача. Одкстопнесаськ Веронь службать, тиенттяма тя отрасляти цифровизация. Мордовияса эряй сядода лама национальность — тя оцю генетическяй козяши. Минь сяда товга карматама работама тя ширеть коряс. Сюкпря ширень кирдеманкса Россиянь Правительствать социальнай блоконцты».
Мордовия Республикань Оцюнять пресс-службац