Мордовиясь ванфнесы эсь вастонц инь оцю социално-политическяй кемоши мархта региоттнень еткса. Тянь колга корхтави «Петербургская политика» фондть ноябрь ковонь исследованиясонза, кона тяштьф организациять сайтсонза.
Фондонь эксперттне койс коре азозь несколька событиятнень, конат сявфтольхть мяльс регионти вастонь максомста. Васендакиге тя «Ростелекомть», «Светотехника и оптоэлектронное приборостроение» инновационнай кластерть и «Волоконная оптика и оптоэлектроника» промышленнай кластерть еткса стратегическяй партнерствать колга соглашениять кемокстамац.
Марстонь работать главнай ширец – республикань предприятиятнень эса импортть полафнемац и инь од разработкатнень тевс сувафнемасна. Стане жа ширетне кармайхть виияфнема сотрудничествать эсь продукцияснон и услугаснон конкуренциянь кирдемаснон касфнеманкса.
Омбоце няевикс событиясь – Мордовиянь Технопаркть Россиянь технопаркнень Национальнай рейтингснон I-це группазонза сувафтомац. Тя группань лидерхне няфнихть инь оцю эффективность и лангозост инвестиционнай мялень шарфнема.
Полаткшнесы экономическяй тематикать Мордовиять Бурундить мархта сотрудничендамац. Предприятиянь специалисттне аф кунара састь тя государствать столицазонза – Бужумбура ошу. Тяса арьсекшневи нолдамс тевс светонь российско-африканскяй марстонь производствать.
Фондонь аналитикне стане жа кандозь цебярь событиятненди МХАТик саранскяй театрать-студиать панжеманц. Тевсь сянь эса, што театрась арась васенце опытокс Мордовияса театральнай тевса государственно-частнай
партнерстваса. Республикань Оцюнясь Владимир Волков панжемань церемонияса отмечазе, што площадкась лезды аф фкя лацонь кизоса ломаттнень асушиснон панжемаса.