25 майста Мордовиянь Правительствать заседаниянц пингста видеоконференциянь режимса участникне ванозь кизефкснень, конат сотфт 2020-2021 кизонь сексень-тялонь пингти Мордовиянь жилищно-коммунальнай и топливно-энергетическяй комплекснень объектснон и инженернай системаснон анокламаснон мархта.
«Темась пяк важнай, - мярьгсь министронь региональнай кабинетть Председателец Владимир Сушков, - етай тялонь итокне, ужяленди, корхтайхть сянь колга, што примсеви мератне аф сатомшкат. Тянь колга пачфнихть аварийнай ситуациятне, конат улендсть инженернай сетьтнень и жилой фондть эса».
Кода азфоль заседаниять пингста, аварийнай ситуациятнень ламошкасна лиссть кельме и пси ведень сетьтнень эса, мезсь корхтай сянь колга, што аф сатомшка лац работасть «Сарансктеплотранс» и «Саранскгорводоканал» предприятиятне.
Владимир Сушков китькстазе, што сексень-тялонь пингти анокламанкса лядсь аф 3 ковда лама. Работась сталгофневи сянь мархта, што Мордовиясь ашезь лисе ограничительнай мероприятиянь режимста, кона ладяфоль оржа респиратурнай урматнень, пневмониять и од коронавируснай инфекциять виияманкса. Уштомань сезонти анокламась кармай мольфтевома Роспотребнадзорть сембе вешфксонзон пяшкотькшнезь. Стане жа Мордовияса арьсекшневи ладямс сексень-тялонь пингти анокламать мельге эрь кизонь мониторинг.
Коронавирусть сюнеда тевс сувафтф ограничениятнень инкса кирсь жилищно-коммунальнай услуганкса пандомань процентсь. Мордовиянь Правительствать Председателец макссь поручения анокламс тянь коряс соглашеният и ресурсоснабжающай организациятнень кядьста шумотнень реструктуризацияснон коряс графикт.
Заседанияса корхтамась мольфтевсь государственнай и муниципальнай услугатнень электроннай видс етафтомаснон колга. Региональнай Правительствань премьер-министрсь макссь поручения башка оцю мяль шарфтомс цифровой атакатнень эзда исполнительнай властень оргаттнень и местнай самоуправлениянь оргаттнень электроннай системаснон и сетьснон араламаснонды.