Экономикаса Россиянь Президентть майскяй указонзон пяшкотькшнемаснон коряс Мордовия Республикась сувась странань колма инь цебярь региоттнень лувксс. Ня даннайхнень азонкшнесыне «Медиалогия» компаниясь тяддень апрель ковть инкса рейтингса. Исследованиянь васенце строчкать занцесы Чечнясь, омбоце вастса Хакасиясь.
Лятфтасаськ, што етай ковть Мордовиянь Оцюнять нюрьхкяня пингс тевонзон тиендисна Владимир Волков макссь пресс-конференция Россиянь Президентть Владимир Путинонь мархта васедемать итогонзон коряс. Кремляса васедемать пингста корхтамась мольфтевсь республикать сатфксонзон, а стане жа сай пингонди планонзон колга.
Республикань лидерсь пачфтезе, што 2016 кизоть итогонзон коряс ВВП-сь регионца кассь 4,5 процентта, промышленностсь – 7 процентта, кассть основной капиталти инвестициятне. Тячи регионць странаса васенцетнень еткса инновационнай продукциять нолнеманц коряс – марстонь объемть эса пяльксоц 28 процент.
Владимир Волков стане жа азондозе, што тядде Мордовияса тевс сувафтовихть колма од предприятият: кабелень производствать коряс заводсь; медицинскяй препаратонь заводсь, кона работай импортонь полафнемать лангс; светонь од источникнень производстваснон коряс заводсь. Кажнайсь эздост кармай макссема колма миллиартт цалковаень питнеса продукция.
Социальнай сфераса майскяй укаснень пяшкотькшнемаснон коряс Россиянь субъекттнень рейтингсост республикась сувась кемонь инь цебярь территориятнень лувксс. Рейтингонь лидеркс арасть Чечнясь, Свердловскяй областсь и Сахалинскяй областсь.
«Социальнай обязательстватнень пяшкотькшнемасна ащихть тейнек васенце вастса. Стройсемок эряма вастт, завотт, больницят, идень сатт, виияфнемок спортть и культурать, минь касфнесаськ ломаттнень эряфснон качестванц.
Велень эрь од кить, кажнай строяф ФАП-ть или од школать минь ванондсаськ кода Мордовиять сай пингонцты пяк оцю путкс», - отмечазе Владимир Волков МР-нь Госсобранияти Посланиясонза.