Тя кизоть Рузаевка ошть эзда участвовандайхть 2 объектт: Привокзальная площадьсь и панжада менель ала боевой техникань музейсь Луначарского ульцять эса.
Площадть мазопнесазь Казанскяй Божий Матерть шкайнянцты лемтьф часовнясь, «Лебедянка» Л-2345 паровозсь, а тяфта жа бронзаста тиф машинистть и сонь учениконц фигуратне. Ётай кизоть тя вастть эса ульсь панжф флотоводецт Фёдор Ушаковть бюстец. Привокзальнай площадсь – тя аф аньцек железнодорожниконь ошти ортатне, но и республикав.
Панжада менель ала музейсь – эряхнень и ошень инжихнень ёткса кельговикс ваймамань вастнень эзда фкясь. Эхянь содавикс и питни экспонатсь, конац няфтьф выставкаса, - тя МИ-8 вертолетсь.
Лятфтасаськ, Сембероссиянь рейтинговай вайгялень максомась ётни «Жилье и городская среда» национальнай проектть коряс, Россиянь Президентть мяленц вельде.
Кодама объектсь кармай кочкаф благоустройстванди, арьсемс республикань эряйненди.