Васедемать панжемста Артём Здунов шарфтсь мяль гуманитарнай миссиянь волонтёронь анокламань центратнень тиемаснон важнайшинц лангс. Синь главнай задачасна — од региоттнень эса работаманкса доброволецонь региональнай командатнень пуроптомасна.
Республикань Оцюнясь лятфтазе, што Мордовиясь сявсь шефства Херсонскяй областень Каланчакскяй округть лангса и максси сембе ширдень лезкс инфраструктурань петемаса-тиемаса, здравоохранениянь, образованиянь и муниципалитетть эряфса социально-экономическяй лия сфератнень ладямаса.
Тячи волонтёрхне активнайста лезнихть Донецкяй и Луганскяй народнай республикань, Херсонскяй и Запорожскяй областень больницятнень и школатнень эса. Донбасса партиять ширень кирдеманц вельде панчфт идень центрат, коса стирьхненди-цёратненди ули кода ётафтомс пингснон, получамс психологическяй лезкс. «Сяс эрть эздонт кармай возможностец няфтемс инь цебярь качествантень, - мярьгсь Мордовиянь Оцюнясь. - Азса, што Приволжскяй федеральнай округсь сувси гуманитарнай миссияс волонтёрхнень прважсемаснон коряс инголе моли региоттнень лувксс».
Волонтёронь анокламань центрать тиемац лезды виияфтомс тя работать, пуроптомс доброволецонь региональнай команда. Тя задачати эряви поладомс вусненди, образовательнай организациятненди, од ломанень политикань лидерхненди. Теоретическяй блокта башка, доброволецненди учебнай программати сувафтомат ситуационнай и практическяй тонафнемань форматсь, общефизическяй, тактическяй, огневой, строевой, медицинскяй анокламать, военно-поисковай работать коряс занятият, спортонь военно-прикладной виттнень коряс пялькстомат и команднай тактическяй налхкомат.
Работада инголе лама, но минь волонтёроньке стака задачада аф пелихть. Ламотне ёткстост ульсть ни од территориятнень эса.
Мордовиянь молодогвардеецнень лидерсна Данил Ульянов азондсь гуманитарнай миссиятнень работаснон колга, азозе работань эсь опытонц. Сон шарфтсь мяль, што волонтёронь школаса тонафнемась лезды стирьхненди-цёратненди улемс анококс любой ситуациятненди.
Гуманитарнай миссиятнень эса участвовандамань эсь опытснон колга азондсть Темниковскяй медицинскяй колледжень студентсь Владислав Афонин, М.Е.Евсевьевонь лемса МГПУ-нь студентсь Никита Дорожкин, «Поиск» республиканскяй патриотическяй объединениять исполнительнай директороц Виктория Дорофеева.
“#МЫВМЕСТЕ» региональнай штабть военнослужащайхненди и синь семьяснонды лездомать коряс работанц колга азондсь сонь руководителец Анастасия Кидяева.
Артём Здунов спасибась волонтёрхненди патриотизманкса и ответственнай гражданскяй позициянкса.
Мордовия Республикань Оцюнять пресс-службац