10-це февральста Мордовиясь кярьмодсь "Лыжня России" Всероссийскяй массовай курькснемати. Спортонь эрь кизонь илась - инь кяльговись Мордовиянь эряйхнень ёткса. Сембе Россиять мархта сокс лангс арасть школьникне, студеттне, соксонь спортонь кяльгихне, профессионалхне и ветераттне, республикань общественнай деятельхне, а тяфта жа лия регионста саф инжихне.
Мероприятиясь коень коряс марстопнесыне эрь кодама поколениянь ломаттнень, конатненди семиянек спортти кярьмодемась - эрямань норма. Тяшкстасаськ, што Семиянь кизоста, конанц азозе минь Президентоньке, соксса массовай курькснемань программась пяшкотьфоль семиянь спортса.
Тяфта жа китькстасаськ, што 42-це "Лыжня Россиись" лемтьф Лениградть фашистонь блокадать эзда араламста 80 кизонь топодемати: тейнек фалу мяляфтома народоньконь подвигоц Великай Отечественнай войнаса.
Саранскяень Соксонь-биатлононь комплексти тя шиста сашендсь Мордовиять Оцюняц Артём Здунов, сон макссь ушедкс соксонь курькснематненди.
" Тядде афкуксонь тяла - лову, кяльме, кодамокс сон уленди Россияса. Сембонди, кит састь тячинь мероприятияти азан сюкуняма валхт - минь комозцеда тяшкава келиста ётафнесаськ "Лыжня Россиить" Мордовияса, - пшкядсь курькснемань участникненди республикать руководителец. - Мъзярошка цифра: инь од и инь сире участникть ётксна - 80 киза. Арьсетяда - мзярос эряй афкуксонь лыжниксь! 50 лама семия састь семиянь эстафетати. Сюкпря, што саде идентень мархта. Уцяска, цебярь мяльхть и сембонди шумбраши!".
"Лыжня Россиись" ётась Мордовиянь сембе аймакнень эса - сембоц эсонза примасть участия колма тёжяда лама ломань.
Китькстасаськ, што массовай курькснемась ётафневи "Демография" нацпроектть "Спорт - норма жизни" федеральнай проектонц перьф. Тя проектть коряс республикаса мекольдень кизотнень полафтовсь спортонь инфраструктурась, одкстоптф Соксонь-биатлононь комплекссь, рамаф од спортинвентарь.
Россиянь Президентть тяфтама кирдеманзон вельде Мордовиянь эряйхнень эвондась уликсшисна кярьмодемс физкультурати и спортти тяниень пингонь и комфортнай площадкатнень лангса. Спортивнай Мордовиять девизоц - " Массовай спортть эзда Олимпийскяй рекорттненди!" - арси афкуксоннекс.
Мордовия Республикань Оцюнять пресс-службац