12 январьста Российскяй Федерациянь Центральнай избирательнай комиссиясь кемокстазень Россиянь Президентонди кандидатть Владимир Путинонь 259 довереннай лицанзон. Синь лувкссост колма представительхть Мордовияста – С.Д.Эрьзянь лемса изобразительнай искусствань Мордовскяй республиканскяй музейть вятиец Людмила Нарбекова, «Мемориальный музей военного и трудового подвига 1941-1945 гг.» МУК-ть директороц Николай Кручинкин, «Известия Мордовии» газетать главнай редактороц Олег Каштанов.
Людмила Николаевна Нарбекова – живописец, график, модельер, педагог. Сон Россиянь художниконь Союзонь член. 2004 кизоста сявомок вятьсы С.Д.Эрьзянь лемса МРМИИ-ть, коса пуроптф сембе мирса содаф скульпторть Степан Эрьзянь, а стане жа живописецть Федот Сычковонь инь оцю коллекциясна.
Николай Андреевич Кручинкин – «Мемориальный музей военного и трудового подвига 1941-1945 гг.» МУК-ть директороц, Мордовия Республикаса «Россиянь поисковай движениять» Региональнай отделениянц Советонц председателец. Сувси республикань деятельхнень еткс, конат заняфт од ломаттнень патриотическяй воспитанияснон мархта. Сонь лемоц кемоста сотф «Поиск» республиканскяй движениять мархта, кона 1988 кизоста сявомок примси участия Всероссийскяй Мяляфтомань вахтаса.
Олег Александрович Каштанов – общественнай деятель, Мордовия Республикаса ОНФ-ть региональнай штабонц сопредседателец, МР-нь Общественнай палатать сопредседателец, «Известия Мордовии» Автономнай учреждениять главнай редактороц, «МедиаСоюз» СМИ-нь работниконь Общероссийскяй общественнай организациять мордовскяй региональнай отделениянц Президентоц. 2012 кизоня ульсь Россиянь Президентть Владимир Владимирович Путинонь довереннай лицакс.
В.В.Путинонь довереннай лицанзон лувксс сувасть Мордовияса шачфне-касфне Г.В.Плехановонь лемса РЭУ-ть ректороц Виктор Гришин, кона аф весть кочксевсь Российскяй Федерациянь Государственнай Думань депутатокс минь региононьконь эзда, 1993 кизоня ушедсь вятемонза Экономикань министерствать, а 1996 кизоня занцезе Мордовия Республикань Правительствань Председательть должностенц и «Российский союз сельской молодежи»од ломанень Общероссийскяй общественнай организациять Центральнай Советонц председателец Юлия Оглоблина. Стане жа довереннай лицакс арась Саранскяйть, кода 2018 кизонь футболть коряс миронь чемпионатонь ошть-организаторть посолоц, Российскяй Федерациянь Народнай артистсь Игорь Бутман.
Сембоц Владимир Путинонь кармай 500 лама довереннай лицац.