Инголи ащи тематнень эзда фкясь – республикать ведень объектонзон меки ладямасна. Инсар ляйть коряс тячи вановихть кафта кизефкст: «Мордовия Арена» стадионтть ваксса руслать ароптомац, а тяфта жа ляйть русланц ароптоманц коряс омбоце этапть ётафтомац. Инсарсь – республикать столицанц инголи ащи ведень саноц. Тиендеви мератне лездыхть нюрьхкалгофтомс зиянонь рискнень –куттнень, частнай постройкатнень и приусадебнай участкатнень ваямаснон коряс.
Россиянь Минприродыть оцюняц азозе, што 2024-це кизоня ванфт ярмакт набережнайть ваксса ляйть ароптоманц коряс проектонь документациятнень арьсемаснонды, а 2025-це кизоста сявомок тя тевти финансированиясь кармай млема «Защита от наводнений и иных негативных воздействий вод и обеспечение безопасности гидротехнических сооружений» федеральнай проектть эзда. Ляйть ароптомань омбоце этапонц коряс регионтти маластонь пингть эряви максомс заявка и эрявикс документт.
Тяфта жа совещанияса вановсь Саранскяень Октябрьскяй районса (Мкаровкаса и Луховкаса, коса эрь кизоня тунда лисенди шада ведь) Тавла ляйть русланц ароптоманц коряс проектнай документациянь тиеманди финансированиянь кизефкссь. Александр Козлов кемафтсь, што ПСД-нь разработканди финансированиять коряс заявкась кармай ванф башка 2024-це кизонь апрельс.
2023-це кизоня федеральнай кирдемать вельде Саранскяйса ётасть покодемат Саранка ляйть лангса: кепотьф 60 тёжяда лама потмаксонь отложениянь и тоенонь «кубт», урядафт кархчу васттне. Тя покодемась тусь цебярьс 1,5 тёжят ломаненди, кинь кудсна ащихть ляйть търваса.
Васедемань омбоце темакс арась вирень пожархнень кардамасна и синь профилактикасна. Тячинь шити республикаса нолявихть тевс 27 видеокамерат, конатнень вельде мольфтеви фалунь ванома региононь вирьхнень мельга. Мониторингсь фатни вирень фондонь территориянь 82%. Тядде арьсеф рамамс нинге вете видеокамерат региональнай ярмакнень лангс. Республикать Оцюняц Артём Здунов китькстазе, што вирень пожаронь мониторингть эряфти ётафтоманц перьф, «Лесохранитель» программнай комплекссь няфтсь оцю эффективность.
Тяфта жа Александр Козлов казсь Мордовиять Оцюнянцты Сюкуняма сёрма Россиянь Минприродыть эзда, электроннай и электрическяй отхоттнень башка кочкамаснон коряс системать тиеманц инкса «Школа утилизации: электроника» федеральнай экологическяй программать перьф.
Мордовия Республикань Оцюнять пресс-службац